«Altyn Orda» bazarynda salynyp jatqan 3 pavilon salymshylary Qasym-Jomart Toqaevqa úndeý jasady. «Altyn Orda» bazarynyń burynǵy basshysy Daniiar Álpievke aldandyq» degen saýdagerler «Álpievtiń áieli men advokaty áleýmettik jeliler arqyly aqparattyq manipýliatsiia jasap, tergeýge áser etý úshin túrli aila-sharǵy jasaýda» dep alańdaýly, - dep habarlaidy Dalanews.kz.
Álpievtiń áieli Alma Álpieva buǵan deiin «áleýmettik jelide «Altyn Orda» bazarynda jumys istemeitin jáne jalǵan salymshylar suhbat berýde» degen bolatyn. Alaida búgin qurylys basyna jinalǵan úleskerler Almagúl Álpievanyń sózin joqqa shyǵardy.
«Biz «Altyn Ordadaǵy» qurylysqa salymshymyz. Salymshy retinde Toqaevqa úndeý jasaimyz. Birinshiden, Daniiar Álpievtiń áieli bizge jala jabýdy toqtatsyn. Biz jalǵan adam emespiz, bárimiz salymshymyz. Ekinshiden, búkil qujatty jinap alyp ketken Marjan Esjanova tabylsyn. Úshinshiden, Daniiar Álpiev 300-den astam salymshydan jinaǵan aqshany qaitarsyn», - deidi Prezidentten arasha suraǵan salymshylar.
Álpievtiń áieli «jalǵan salymshy» dep ataǵan jannyń biri – Gúlaiym Maqasheva. Ol pavilon qurylysyna 4 million teńge salǵan. Onyń sózinshe, «jalǵan salymshy» dep aiyptaǵan Álpievtiń áieli jala jaýyp otyr.
«Men «Altyn Orda» bazarynda 2004 jyldan beri jumys jasaimyn. Qurylysqa 2024 jyldyń qazan aiynan bastap qarajat quiyla bastady. Álpievtiń áieli meni «jalǵan salymshy» dep búkil áleýmettik jelilerde aityp jatyr. Kezinde suhbat bergende tegimdi Gúlaiym Siziabai dep qazaqsha aitqanmyn. Negizinde tegim Gúlaiym Maqasheva. Al olar «siz salymshy emessiz» dep jala jaýyp jatyr. Álipev kezindegi qolyma berilgen chekte Gúlaiym Maqasheva dep jazylǵan. Jáne olar qazir meni belsendilik tanytqanym úshin sotqa berip jatyr. Olar tek bizge chek berip keldi, kelisim-shart jasalmady. Biz bes-alty ai boiy kelisim-shart suraǵanda bermei keldi. Aqyrynda basshylyq aýysty. Sodan keiin Daniiardy eki ai kúttik. Kelmedi. Sosyn osy 300 salymshynyń salǵan qarajatyn moiyndatý úshin quzyrly oryndarǵa aryz jazdyq», - deidi Gúlaiym Maqasheva.
Salymshylardyń aitýynsha, Daniiar Álpiev bazar basshylyǵynda turǵan kezde árqaisy túrli kólemde jańa pavilonnyń qurysylyna aqsha salǵan. Jalpy sany 300 salymshy 1 milliard 600 teńge kóleminde qarajat quiǵan.
Taǵy bir salymshy Jadyra Qaishaevanyń Álpievtiń kesirinen áli kúnge deiin daladaǵy saýda núktesinde júrgenin aitady. Al «shyndyqty aitqanymyz úshin kinálimiz» degen salymshylardyń bári Almagúl Álpievanyń japqan jalasyn túsinbei álek.
«Qyzdardyń ústinen jala jaýyp jatyr. Olar «2024 jyldyń aiaǵynda qurylysty bitiremiz dep aitqanbyz» deidi. Negizinde 10 aida bitirip beremiz degen. Álpiev solai aitqan. Al qazir Álpievtiń áieli basqalai sairap jatyr. Biraq aitylǵan ýaqytta qurylys bitpedi. Eki jylǵa sozylyp ketti. Olar qurlystyń tórtten birin ǵana jasady. Qudaiǵa shúkir, qazir jańa basshylyq kelip, qurylys jaqsy júrip jatyr», - deidi Jadyra Qaishaeva.
Esterińizge salaiyq, «Altyn Orda» ámbebap saýda keshenin jalǵa alǵan Daniiar Álpievtiń basshylyǵyndaǵy «Altyn Orda New Company» JShS úshinshi pavilondy salý úshin 300-den astam úleskerden zańsyz qarajat jinaǵan. Bazardyń basqarýshy kompaniiasy «Kompaniia nomer odin» JShS direktory Aleksandr Nedogarko óz sózinde úleskerlerge saýda kesheniniń qurylys jumystarymen ainalysatyn jańa «Praim Stroi XXI» JShS qurylys kompaniiasymen tanystyryp, kásipkerlerdiń saýda oryndarynsyz qalmaýyn qamtamasyz etýdi atalǵan qurylys kompaniiasymen birge jaýapkershilikke alatyndaryn atap ótken bolatyn. Qazir qurylys jumystary qarqyndy júrip jatyr. Al burynǵy basshy Daniiar Álpiev qazir tergeý abaqtysyna qamalǵan.
Aita keteiik, búgingi jiynda Daniiar Álpievtiń advokaty tóbe kórsetken edi. Alaida ol salymshylardyń sandaǵan suraqtaryna mardymdy jaýap bere almady. Al bazardyń basqarýshy kompaniiasy «Big City Market» JShS zańgeri Izbasar Óteýlin bolsa, Álpievtiń advokatynyń sózinde qarama-qaishylyq kóp ekenin aitady.
«Qazirgi ýaqytta Daniiar Álpievten japa shekken 300-den astam úleskerdiń shaǵymy Almaty oblysynyń PD tirkelip tur. Búgin sóilegen Daniiar Álpievtiń advokatynyń kóp sózin jalǵan dep tanimyz, sebebi Álpiev bazardy jalǵa alýshy direktor bolsa da, oǵan salymshylardan aldyn-ala aqsha jinaý quqyǵy berilmegen.
Álpievtiń kompaniiasy aqshany aýdardyq deidi, biraq artynan anyqtalǵandai, ol aýdarylǵan aqsha zardap shekken úleskerlerge emes, sol tusta úshinshi pavilonnyń qurylysymen ainalysqan óziniń dosyna aýdarǵan. Iaǵni túptep kelgende óz-ózine aýdarǵan bolyp tur. Qazirgi ýaqytta qurylys jumystaryn bazardyń jańa basqarýshy kompaniiasy jalǵastyrýda», - dedi Izbasar Óteýlin.
