Taldyqorǵanda kezekte turǵan 51 otbasy jańa baspananyń kiltine ie boldy. Jańa qonys ielerin Jetisý oblysynyń ákimi Beibit Isabaev quttyqtady, dep habarlaidy dalanews.kz.
Óńir basshysy atap ótkendei, azamattardy qoljetimdi turǵyn úimen qamtamasyz etý – halyqtyń ómir súrý sapasy men áleýmettik ál-aýqatyn arttyrýǵa baǵyttalǵan memlekettik saiasattyń basym baǵyttarynyń biri.
– Memleket basshysynyń tapsyrmasy aiasynda óńirde turǵyn úi qurylysynyń qarqyny jyldan jylǵa artyp keledi. Máselen, jyl basynan beri Taldyqorǵan qalasynyń ózinde 49 myń sharshy metr turǵyn úi paidalanýǵa berildi. Iaǵni ótken jyldyń sáikes kezeńimen salystyrǵanda 3,4 paiyzǵa artqan. Jyl sońyna deiin kezeń-kezeńimen Taldyqorǵannyń 1400-den astam otbasyn qoljetimdi baspanamen qamtamasyz etýdi josparlap otyrmyz, – dedi B. Isabaev.
Jańa baspana kezekte turǵan azamattarǵa memlekettik qoldaý sharalary aiasynda berildi. Olardyń arasynda kópbalaly jáne tolyq emes otbasylar, jetim balalar men ata-anasynyń qamqorlyǵynsyz qalǵan balalar, I jáne II toptaǵy múgedektigi bar azamattar bar.
Jańa qonys ieleri óz áserin bólisti:
– Búgin otbasymyz úshin úlken qýanysh. Jańa qonysqa ie bolyp jatyrmyz. «Jastar-3» shaǵyn aýdanyndaǵy jańa úiimizdiń kiltin qolymyzǵa aldyq. Turǵyn úi kezeginde 9 jylǵa jýyq turdym. Alty bala tárbielep otyrmyn, onyń beseýi mektep oqýshylary, – dedi Dinara Otarbaeva.
– 2017 jyldan beri turǵyn úi kezeginde turdym. Qýanyshymdy sózben aityp jetkie almaimyn. Eń aldymen balalarymdy ertip aparyp, ózderiniń jeke úilerin kórsetemin. Endi olardyń óz bólmeleri bolady, keń ári jaily jerde turatyn boldyq. Osy ýaqytqa deiin talai jyl páter jaldap turdyq. Endi, mine, óz baspanamyz bar. Kórsetilgen qoldaý úshin shyn júrekten alǵys aitamyn, – dedi Dana Jamanaeva.
– Turǵyn úi kezeginde 10 jyl turdyq. Osy ýaqyt ishinde bir jaldamaly páterden ekinshisine kóship, talai qiyndyqty bastan ótkerdik. Balalarmen birge kóship-qoný árine qiyn boldy. Endi munyń bári artta qaldy. Jas otbasymyzdyń jańa shaǵyn aýdanda óz baspanasy bar dep qýanyp jatyrmyz, – dedi «Qulager» shaǵyn aýdanynan páter alǵan Torǵyn Toishybekova.
Atap ótsek, aldaǵy ýaqytta Taldyqorǵan qalasynda «Birlik» shaǵyn aýdanynda 170 páterge arnalǵan eki kredittik úidi paidalanýǵa berý josparlanyp otyr. Sondai-aq jyl sońyna deiin «Yntymaq» turǵyn alabynda 200 páterge arnalǵan bes besqabatty úidiń qurylysy aiaqtalyp, paidalanýǵa beriledi.
Jalpy, sońǵy 4 jylda Jetisý oblysynda 1,4 mln sharshy metr turǵyn úi paidalanýǵa berilip, 11 myńǵa jýyq astam otbasy jańa qonysqa ie boldy.
