Beijiń olimpiadasynyń chempiony, dańqty boksshy, Bokstan QR Jastar quramasynyń bas bapkeri Baqyt Sársekbaev jaqynda kezekti jarystan oraldy, dep habarlaidy dalanews.kz.
Indoneziianyń astanasy Djakartada jastar arasyndaǵy U19 Aziia chempionatynda komanda qandai jetistik kórsetti? Al bapkerdiń óziniń nege kóńili tolmaidy?
— Baqyt myrza, jaqynda ǵana Indoneziia elinde ótken Aziia chempionatynan oraldyńyz. Qalai ótti, jalpy qorytyndysy kóńilińizden shyqty ma?
— Joq, kóńilimnen shyqqan joq.
— Nege? Mysaly, Jastar quramasynyń byltyrǵy nátijesimen salystyratyn bolsaq, biylǵy nátije eki ese joǵary dep aitsaq bolady. Degenmen, qanjyǵańyzda 2 altyn 4 kúmis, 2 qola bar ǵoi.
— Kóńilim tolmaidy. Biz úshin bul óte az. Bizde odan da kóp alýǵa qaýqarymyz jetedi. Bap shapqanymen baq shappasa qiyn eken.
— Iá, bárimiz kórip, kúiip pistik, keibir balalardyń jeńisin kózimizdi baqyraityp qoiyp urlady. Sonda jankúierlerdiń kóp qoiatyn suraǵy mynaý: nege narazylyq tanytpaidy, Áýesqoi boks federatsiiasy qaida qarap otyr? Al Golovkin qaida?
— Appeliatsiia, shaǵym túsirýge tiym salynǵan. Al óz basym bizdiń federatsiianyń bir de bir ókilin jáne Golovkindy da ol jerde kórgen joqpyn.
— Qalai sonda? Jarty álem jinalǵan, eń jaýapty sanalatyn bairaqty básekege bir de bir federatsiia ókili jáne World Boxing uiymynyń basshysy barmaǵany ma? Nege?
— Barǵan joq. Nege ekenin ózderinen surarsyzdar bolady.
-Qyzyq eken. Qazaqstannan barǵan 40 boksshyny qoldaýsyz qaldyryp, bairaqty básekege ókilsiz jiberetindei, ol kisilerdiń basqa qandai mańyzdy sharýasy bolýy múmkin?
— Ol jaǵyn bilmedim.
— Jaraidy. Endeshe bul suraqty aqparat quraldary arqyly ózderine joldaiyq.
Jalpy sizdiń distsiplinaǵa qatal, jáne ózińizge synshyl ekenińizdi bilemiz. Balalardy temirdei áskeri tártipte ustaidy degen qanshalyqty ras?
— Distsiplina bet klass, degen meniń ómirlik printsipim. Tártip bolmaǵan jerde, nátijege qol jetkizý qiyn. Mysalǵa, fýtboldy alaiyq, keshegi Ispaniia komandasyn. Bir komandada 20 shaqty millioner júr. Solardyń bári qarapaiym bapkerge, tóreshige 100% baǵynady. Bizde keide sál jetistikke qol jetkizse, kisi bola bastaidy, sodan nátije de joǵalady. «Ár boksshym meniń jalǵyzym» deimin. Olardyń árqaisysyn betinen oqyp turamyn, olar úshin qolymnan kelgenshi ter tógemin, biraq bosańsýǵa jol joq.
