Almatyda qalanyń barlyq joǵary oqý oryndarynyń stýdentterine arnalǵan daǵdarys ortalyǵy ashyldy. Jańa keńistik bir ai boiy M. Tynyshpaev atyndaǵy ALT University-diń jańartylǵan №1 stýdentter úiiniń bazasynda jumys isteidi. Ortalyq qiyn ómirlik jaǵdaiǵa tap bolǵan jastarǵa ýaqytsha turýǵa jáne keshendi qoldaý alýǵa múmkindik beredi, dep habarlaidy dalanews.kz.
Ortalyqtyń basty ereksheligi – kómek tek ALT University stýdentterine ǵana kórsetilmeidi. Almatydaǵy kez kelgen joǵary oqý ornynyń stýdentteri túrli ómirlik jaǵdailarǵa bailanysty ýaqytsha turatyn jeri bolmaǵan jaǵdaida nemese áleýmettik, psihologiialyq ne konsýltatsiialyq qoldaýdy qajet etken kezde ortalyqqa júgine alady. Osy maqsatta Stýdentter úiinen 50 oryn bólingen.
Almaty qalasy Jastar saiasaty basqarmasy basshysynyń orynbasary Miras Nysanalievtiń aitýynsha, daǵdarys ortalyǵy stýdent jastardy qoldaýdyń qoldanystaǵy júiesin keńeitip, jastardyń tek turmystyq emes, áleýmettik máselelerine de jedel den qoiýǵa múmkindik beredi.
«Almaty – elimizdegi eń iri stýdenttik ortalyq. Sondyqtan bilim alýǵa kelgen jas qandai da bir qiyn jaǵdaiǵa tap bolǵan kezde jalǵyz qalmaitynyn sezinýi biz úshin asa mańyzdy. Stýdentter ýaqytsha baspanasynan aiyrylýdan bastap, psihologiialyq nemese áleýmettik kómekke muqtaj bolýǵa deiin túrli jaǵdailarǵa tap bolýy múmkin. Daǵdarys ortalyǵy stýdent qai joǵary oqý ornynda bilim alatynyna qaramastan, qoldaý surap júgine alatyn orynǵa ainalýy tiis. Bizdiń mindetimiz – tek ýaqytsha baspanamen qamtamasyz etý emes, jasqa qiyn kezeńnen ótýge kómektesip, oqýyna jáne qalypty ómirine qaita oralýyna jaǵdai jasaý», – dedi Almaty qalasy Jastar saiasaty basqarmasy basshysynyń orynbasary Miras Nysanaliev.
Ortalyq Maýlenov kóshesi, 108A mekenjaiynda kúrdeli jóndeýden keiin ashyldy. Jataqhananyń jalpy syiymdylyǵy – 487 oryn, ǵimarattyń aýdany – 7 myń sharshy metrden astam.
Qaita jańǵyrtýdan keiin munda zamanaýi stýdenttik orta qalyptastyryldy: turǵyn bólmeler, asúiler men turmystyq bólmeler, ózdiginen bilim alýǵa arnalǵan keńistikter, demalys bólmeleri, kir jýatyn oryn, sporttyq aimaq jáne trenajer zaly jabdyqtalǵan.
Daǵdarys ortalyǵynda turatyn stýdentter úshin oqý jáne turmystyq aimaqtary bar jeke turǵyn bólmeler, asúi modýlderi jáne sanitarlyq-gigienalyq bólmeler qarastyrylǵan. Sondai-aq olar sport zaly men qajet bolǵan jaǵdaida alǵashqy meditsinalyq kómek kórsetiletin meditsinalyq pýnktti paidalana alady. Turý kezeńinde jastar psihologiialyq, áleýmettik jáne konsýltatsiialyq qoldaý ala alady. Ortalyq jumysynyń mańyzdy qaǵidattarynyń biri – árbir ótinishtiń qupiialylyǵyn saqtaý jáne stýdenttiń jaǵdaiyna jeke kózqaras tanytý.
QR Ǵylym jáne joǵary bilim ministrligi Joǵary jáne joǵary oqý ornynan keiingi bilim komiteti tóraǵasynyń orynbasary Akerke Abylaihannyń aitýynsha, mundai jobalar stýdenttik infraqurylymdy damytý turǵysynan ǵana emes, bilim alýshylardy qoldaýdyń tolyqqandy júiesin qalyptastyrý úshin de mańyzdy.
«Zamanaýi bilim berý ortasy – bul tek aýditoriialar, bilim berý baǵdarlamalary men oqytý sapasy emes. Stýdenttiń qandai jaǵdaida ómir súretini jáne qiyn ómirlik jaǵdaiǵa tap bolǵan kezde qaida júgine alatynyn bilýi de mańyzdy. Ártúrli joǵary oqý oryndarynyń stýdentterine ashyq daǵdarys ortalyǵynyń qurylýy osyndai qoldaý júiesin damytýdaǵy mańyzdy qadam. Munda jas ýaqytsha baspana, konsýltatsiialyq, áleýmettik jáne psihologiialyq kómek ala alady. Eń bastysy – bilim alýyn tynysh ári qaýipsiz jaǵdaida jalǵastyrýǵa múmkindik alady», – dedi Akerke Abylaihan.
Qalalyq daǵdarys ortalyǵy qiyn ómirlik jaǵdaiǵa tap bolǵan Almaty stýdentterine jedel kómek kórsetýdiń qosymsha tetigin qalyptastyrýǵa baǵyttalǵan. Joba birden birneshe baǵytty qamtidy: ýaqytsha baspana, áleýmettik beiimdeý, psihologiialyq qoldaý jáne qaýipsiz ári jaily jaǵdaida bilim alýdy jalǵastyrý múmkindigi.
Daǵdarys ortalyǵynyń bailanys telefondary:
+7 700 255 14 43
+7 700 950 95 28
+7 727 237 01 70
