Almaty oblysynda «Taza Qazaqstan» baǵdarlamasy aiasynda qatty turmystyq qaldyqtardy qaita óńdeý salasynda jalpy quny 148,8 mlrd teńgeni quraityn 8 iri investitsiialyq jobany iske asyrý josparlanýda. Bul týraly Óńirlik kommýnikatsiialar qyzmeti alańynda ótken baspasóz máslihatynda Almaty oblysynyń turǵyn úi-kommýnaldyq sharýashylyq jáne abattandyrý basqarmasynyń basshysy Dimash Qojabekov málimdedi, dep habarlaidy dalanews.kz.
Óńirde sanitarlyq tazalaý jáne stihiialyq qoqys úiindilerin joiýmen qatar, jeke investitsiialardy tarta otyryp, qaldyqtardy qaita óńdeýdiń zamanaýi tolyqqandy júiesin qalyptastyrýǵa basymdyq berilýde. Josparlanǵan jobalar qatarynda elektr energiiasyn óndiretin qoqys jaǵý zaýytynyń qurylysy, taǵam qaldyqtaryn óńdeý keshenin iske qosý, qoqysty suryptaý kesheni men bioelektr stantsiiasyn salý kózdelgen. Sondai-aq bul jobalar júzege asqanda 300-den astam jańa jumys oryndary ashylady.
Sonymen qatar óńirde qaitalama shikizatty qaita óńdeýmen ainalysatyn birqatar kásiporyn jumys istep tur. Qazirgi tańda Almaty oblysynda plastik, makýlatýra, shyny jáne tozǵan avtodóńgelekterdi suryptap, qaita óńdeitin 6 iri jáne birneshe shaǵyn kásiporyn bar. Olar jyl saiyn 184 myń tonnadan astam qaldyqty suryptap, qaita óńdeidi.
Atap aitqanda, plastik qaldyqtaryn «P.T.Z.» kompaniiasy, makýlatýrany – «Kz.Recycling» kásiporny óńdeidi. Shyny qaldyqtaryn jinaý jáne qaita óńdeýmen «Almaty Steklo» men «Qazaq Glass Company» ainalysady. Al tozǵan avtodóńgelekterdi «Eko Tehnologiia» jáne «Urban Core Beverly Hill Group» kompaniialary qaita óńdeidi.
Budan bólek, óńirde jańa investitsiialyq jobalar júzege asyrylýda. «Urban Core Beverly Hill Group» kompaniiasy túrli qaldyqtardy qaita óńdeý óndirisin keńeitýdi josparlap otyr. Jobanyń quny – 48 mlrd teńge. Jańǵyrtý jumystarynan keiin kásiporyn jylyna 40 myń tonnaǵa deiin qaldyq óńdei alady.
Eńbekshiqazaq aýdanynda « Gýandýn Sýchýn» kompaniiasy quny 3 mlrd teńge bolatyn qoqys óńdeý zaýytyn salyp jatyr. Sondai-aq Qarasai aýdanynda «Kaz Waste Conversion» kompaniiasy quny 15,5 mlrd teńge bolatyn qaldyqtardy suryptaý jáne qaita óńdeý kesheniniń qurylysyn júrgizýde.
«Taza Qazaqstan» baǵdarlamasy aiasyndaǵy kógaldandyrý jáne ekologiialyq infraqurylymdy damytýǵa da erekshe kóńil bólinýde. Jyl basynan beri oblysta 103 myńnan astam aǵash otyrǵyzyldy. Búginde óńirde jalpy aýmaǵy 69 myń gektardan asatyn 20-dan astam ekopark jumys isteidi. Sonymen qatar ekologiialyq jáne týristik aimaqtardy qurý boiynsha jańa jobalar iske asyrylýda.
«Taza Qazaqstan» baǵdarlamasy aiasynda Almaty oblysynda 2024–2029 jyldarǵa arnalǵan óńirlik is-sharalar jospary júzege asyrylýda. Jumys sanitarlyq tazalaý, stihiialyq qoqys oryndaryn joiý, qaldyqtardy qaita óńdeý júiesin damytý jáne kógaldandyrý siiaqty birneshe baǵyt boiynsha júrgizilýde. Ekologiialyq quqyqbuzýshylyqtardyń aldyn alý maqsatynda oblys aýmaǵynda 9 myńnan astam beinebaqylaý kamerasy ornatyldy. Al 2026 jyly aýmaqtardy sanitarlyq tazalaýǵa jergilikti biýdjetten 1,5 mlrd teńge bólindi. Sonymen qatar óńirde qatty turmystyq qaldyqtardy qaita óńdeý salasyndaǵy jańa investitsiialyq jobalar iske asyrylýda», – dedi Almaty oblysynyń turǵyn úi-kommýnaldyq sharýashylyq jáne abattandyrý basqarmasynyń basshysy Dimash Qojabekov.
