Daǵystanda úilený toiynan keiin týyndaǵan janjal adam ólimimen aiaqtaldy. 24 jastaǵy jigit birneshe jerinen pyshaq jaraqatyn alyp, aýrýhanada kóz jumǵan, dep habarlaidy dalanews.kz.
Oqiǵa Súleiman-Stal aýdanyndaǵy Ashaga-Stal-Kazmaliar aýylynyń mańynda bolǵan. Politsiia málimetinshe, marqum men 27 jastaǵy aýyl turǵyny buǵan deiin bir tanysynyń úilený toiynda sózge kelip qalǵan.
Keiin eki er adam máseleni ózara sheshý úshin qaita kezdesken. Alaida áńgime taǵy da janjalǵa ulasyp, kúdikti 24 jastaǵy jigitke bes ret pyshaq suqqan.
Aýyr jaralanǵan azamat aýrýhanaǵa jetkizilgenimen, dárigerler onyń ómirin saqtap qala almady. Kúdikti ustalyp, is materialdary Daǵystandaǵy Tergeý komitetine joldanǵan.
Oqiǵa boiynsha Resei Qylmystyq kodeksiniń «Adam óltirý» baby boiynsha qylmystyq is qozǵaldy. Qazir tergeýshiler janjaldyń naqty neden shyqqanyn jáne oqiǵanyń barlyq mán-jaiyn anyqtap jatyr.
Osydan keiin áleýmettik jelilerde marqumnyń dál sol kúni úilengen kúieý jigit bolǵany jáne oǵan alǵashqy neke túninde shabýyl jasalǵany týraly aqparat tarady. Keibir jazbalarda janjalǵa aqsha máselesi sebep bolǵany da aitylǵan.
Alaida bul málimetterdi resmi organdar ázirge rastaǵan joq. Sondyqtan marqumnyń kúieý jigit bolǵany nemese janjaldyń naqty aqshaǵa bailanysty shyqqany jónindegi aqparatqa tergeý qorytyndysyna deiin saqtyqpen qaraǵan jón.
