Búgin Semeide ónegeli ómirimen urpaqqa úlgi bolyp júrgen otbasylardy ulyqtaýǵa arnalǵan «Mereili otbasy» ulttyq baiqaýynyń oblystyq kezeńi jeńimpazdaryn marapattaý rásimi ótti. Saltanatty sharaǵa oblys ákimi Berik Ýáli qatysty, dep habarlaidy dalanews.kz.
«Mereili otbasy» baiqaýy – adamgershilik qundylyqtaryn jańǵyrtýǵa, otbasy mártebesin arttyrýǵa, ata-ananyń bala tárbiesindegi rólin aishyqtaýǵa baǵyttalǵan mańyzdy joba. Baiqaý elimizde 2014 jyldan beri uiymdastyrylyp keledi.
Búginde Abai oblysynda 198 526 otbasy bar. Onyń 18 983-i – kópbalaly otbasylar. Óńirdegi ár shańyraqtyń ózindik tarihy, qalyptasqan dástúri men urpaq tárbiesine qosyp otyrǵan úlesi bar. Biyl «Mereili otbasy» baiqaýyna oblystyń qala-aýdandarynan 129 otbasy ótinish bildirip, olardyń 24-i oblystyq kezeńge joldama aldy.
Marapattaý rásiminde quttyqtaý sóz sóilegen aimaq basshysy otbasy qundylyqtarynyń qoǵamdaǵy mańyzyna toqtalyp, baiqaýǵa qatysqan barlyq januialarǵa rizashylyǵyn bildirdi.
«Búgin biz otbasy qundylyǵyn dáriptep, ónegeli áýlettiń mereiin asyryp, taǵylymdy shańyraqtyń shyraiyn keltirgen aitýly sharada bas qosyp otyrmyz. Memleket basshysy Qasym-Jomart Kemeluly Toqaev: «Ár adam, eń aldymen, óziniń qasterli shańyraǵynda tulǵa retinde qalyptasady, úlgi-ónege alyp, naǵyz azamatqa tán igi qasietterdi boiyna sińiredi. Otbasynda kórgen tálim-tárbieniń arqasynda elimizde otanshyl, eńbekqor, bilimdi jáne mádenietti urpaq ósip shyǵady» – dep erekshe atap ótken bolatyn. Biyl «Mereili otbasy» ulttyq konkýrsy oblysymyzda besinshi ret ótkizilip otyr. Bes jyl ishinde bul baiqaý ónegeli otbasylardyń basyn qosyp qana qoimai, qoǵamǵa jaqsyny kórsetýge, izgilikti dáripteýge, otbasylyq qundylyqtardy jańǵyrtýǵa arnalǵan mańyzdy dástúrge ainaldy. Búgingi marapatty – Otannyń bir bóligi bolǵan otbasyna tárbieniń tunyǵyn berip, baryn baqytym dep baǵalaǵan keń peiil, bala kóńilderińizge oblys jurtshylyǵynyń kórsetken qurmet dep bilersizder. Yntymaǵy men yrysy artqan ár shańyraqqa baq qonyp, balanyń kúlkisi, sábidiń syńǵyry úzilmesin. Mereili otbasylardyń mereii ústem bolyp, abyroiy arta bersin!», – dedi Berik Ýáli.
Baiqaý qorytyndysy boiynsha júldeli I oryndy Besqaraǵai aýdanynyń Qaidarovtar otbasy, II oryndy Abai aýdanynyń Maqaevtar otbasy, III oryndy Aqsýat aýdanynyń Karjikovtar otbasy jáne Jarma aýdanynyń Qumarovtar otbasy ielendi. Baiqaýdyń oblystyq kezeńinde jeńimpaz atanǵan Qaidarovtar otbasy respýblikalyq kezeńge joldama aldy.
«Búgingi baiqaýǵa qatysyp, júldeli bolǵan barlyq otbasylardy shyn júrekten quttyqtaimyn. Shyny kerek, osyndai marapatqa ie bolamyz dep oilaǵan joqpyz. 60 jyldan astam ýaqyt birge ómir súrip, urpaǵymyzdy tárbielep kelemiz. Bul marapat – bizdiń otbasymyzǵa kórsetilgen úlken qurmet. Alǵysymdy bildiremin», – dedi bilim salasynyń ardageri, baiqaý jeńimpazy Jumaǵazy Qaidarov.
Jeńimpazdar men júldegerlerge estelik syilyqtar, sondai-aq, aqshalai sertifikattar tabystaldy.
