Qazaqstan Respýblikasy Bas prokýratýrasynyń suraýy boiynsha Qazaqstan azamaty Qyrǵyz Respýblikasynan ekstraditsiialandy. Ol jábirlenýshiler men ekinshi deńgeili bankterdiń aqshalai qarajatyn jymqyrdy dep kúdikke ilingen, dep habarlaidy dalanews.kz.
Tergeý barysynda 2022–2024 jyldar aralyǵynda Qazaqstannyń úsh azamaty uiymdasqan qylmystyq top quryp, qaitarylmaityny aldyn ala belgili nesielerdi rásimdeý shemasyn ázirlegeni anyqtaldy. Qylmystyq jospardy júzege asyrý úshin olar azamattardy avtokólik satyp alýǵa banktik nesie alýǵa tartqan. Keiinnen atalǵan kólikterdi qaskóiler satyp, túsken aqshany óz qajettilikterine jumsaǵan.
Budan bólek, qylmystyq top músheleri is júzinde joq avtokólikterge banktik nesie rásimdeýge bailanysty taǵy bir alaiaqtyq shemany qoldanǵan. Ol úshin oidan shyǵarylǵan kólik quraldary Almaty qalasynyń Arnaiy halyqqa qyzmet kórsetý ortalyǵynda Qyrǵyz Respýblikasynan ákelingendei zańsyz tirkelgen. Osydan keiin olardyń «satyp alynýy» úshin úshinshi tulǵalardyń atyna ekinshi deńgeili bankterden nesieler rásimdelgen. Osy tásilmen alynǵan qarajatty da sybailastar jeke maqsattaryna paidalanǵan.
"Zańsyz áreketter saldarynan eki qarjy uiymy men 77 jábirlenýshige jalpy somasy 1,8 milliard teńgeden astam materialdyq shyǵyn keltirilgen. Qylmystyq toptyń eki múshesine qatysty tergeý aiaqtalyp, qylmystyq is sotqa joldandy. Úshinshi qatysýshy qylmys jasaǵannan keiin tergeý organdarynan jasyrynyp, oǵan izdeý jariialanǵan. Jedel-izdestirý is-sharalarynyń nátijesinde ol Qyrǵyz Respýblikasynyń aýmaǵynda anyqtalyp, ustaldy. Keiin Qazaqstan Bas prokýratýrasynyń suraýy boiynsha elge ekstraditsiialandy", - delingen habarlamada.
Qazirgi ýaqytta kúdikti tergeý izoliatoryna qamaldy. Ózine taǵylyp otyrǵan qylmys úshin 10 jylǵa deiin bas bostandyǵynan aiyrý jáne múlkin tárkileý túrindegi jaza kózdelgen.
