نازاربايەۆ زياتكەرلىك مەكتەپتەرىندە بەرىلەتىن پرەزيدەنتتىك گرانتتىڭ مولشەرى ازايدى. بۇل تۋرالى ءتيىستى بۇيرىققا ق ر وقۋ-اعارتۋ ءمينيسترى عاني بەيسەمبايەۆ قول قويدى، دەپ حابارلايدى Dalanews.kz.

پرەزيدەنتتىڭ «وركەن» ءبىلىم بەرۋ گرانتى 2009 جىلى العاشقى زياتكەرلىك مەكتەپتەرمەن قاتار ەنگىزىلگەن بولاتىن. بۇل گرانت وقۋ اقىسىن تولىقتاي وتەيدى. وقۋشىلار تەگىن ءبىلىم الىپ، جاتاقحانادا تۇرىپ، تاماقتانا الادى.

جاڭا بۇيرىققا دەيىن گرانت كولەمى مىناداي بولعان:

– 2 349 191 تەڭگە (جاتاقحاناسىز)؛
– 3 247 305 تەڭگە (جاتاقحانامەن).

ەندى بۇل سوما تومەندەتىلدى:

– 2 190 080 تەڭگە (جاتاقحاناسىز)؛
– 3 053 940 تەڭگە (جاتاقحانامەن).

2023 جىلى قابىلدانعان بۇيرىققا سايكەس، گرانت كولەمى جىل سايىن يندەكساسيالاۋعا جاتادى.

نيش مالىمەتىنشە، بيىلعى وقۋ جىلىندا ەل بويىنشا بارلىق زياتكەرلىك مەكتەپتەردە 17 884 وقۋشى ءبىلىم الۋدا. ونىڭ ىشىندە 11%-ى اۋىل، شاعىن قالا مەن اۋدان ورتالىقتارىنان كەلگەن بالالار. سونداي-اق، وقۋشىلاردىڭ شامامەن 39%-ى الەۋمەتتىك وسال توپتاردان.

2025 جىلدىڭ قاڭتارىندا «كۋرسيۆ» باسىلىمى اۋديت قورىتىندىسىنان كەيىن نيش-تا ءبىرقاتار پروسەستەر وزگەرگەنىن حابارلاعان. اتاپ ايتقاندا، اقىلى نەگىزدە وقۋعا قابىلداۋ ەرەجەلەرى وزگەرگەن.