نۇرسۇلتان نازاربايەۆ تۋرالى بىرنەشە فيلم تۇسىرىلگەن. بۇل فيلمدەرگە ەل قازىناسىنان قوماقتى قارجى بولىنگەن. جالپى ەسەپ بويىنشا نازاربايەۆتىڭ ءومىر جولىن باياندايتىن فيلمدەرگە 14،2 ملن اقش دوللارى جۇمسالعان، - دەپ حابارلايدى Dalanews.kz "كۋرسيۆ" باسىلىمىنا سىلتەپ.

• "بالالىق شاعىمنىڭ اسپانى"

نازاربايەۆ جايلى شىققان العاشقى فيلم 2011 جىلى 14 ساۋىردە جارىق كوردى. اشىق دەرەككوزدە بۇل فيلمگە 3 ملن دوللار (قازىرگى كۋرسپەن العاندا 1 ملرد 543 ملن تەڭگە) بولىنگەنى ايتىلادى.

رەجيسسەر رۇستەم ابدىراشيەۆ تۇسىرگەن "بالالىق شاعىمنىڭ اسپانى" – نۇرسۇلتان نازاربايەۆتىڭ بالالىق شاعى تۋرالى باياندايتىن كوركەم فيلم. وقيعالار نەگىزىنەن تۇڭعىش پرەزيدەنتتىڭ تۋعان جەرى شامالعان اۋىلىندا وتەدى. 

• "ەلباسى جولى"

بيۋدجەتى 2 500 000 دوللار (1 ملرد 286 ملن تەڭگە) دەلىنەدى. كاسسالىق ءتۇسىم: 175 199 دوللار. رەجيسسەرى: رۇستەم ابدىراشيەۆ

بۇل فيلم نۇرسۇلتان نازاربايەۆتىڭ تەمىرتاۋداعى قاراپايىم جۇمىسشى بولعان جىلدارىن سۋرەتتەيدى. تۋىندىدا نازاربايەۆ مەتاللۋرگيا كومبيناتىندا جۇمىس ىستەپ ءجۇرىپ، ءوزىنىڭ كوشباسشىلىق قاسيەتتەرىن كورسەتەدى. 

• "تىعىرىقتان جول تاپقان"

شىعۋ ۋاقىتى: 4 جەلتوقسان 2014 جىل. بيۋدجەت: 2 500 000 دوللار (1 ملرد 286 ملن تەڭگە). كاسسالىق ءتۇسىم: 99 228 دوللار (51 ملن تەڭگە). رەجيسسەرى: رۇستەم ابدىراشيەۆ

فيلمدە نۇرسۇلتان نازاربايەۆتىڭ ساياسي ارەناعا قادام باسۋى، 1980ء-شى جىلدارداعى قازاقستانداعى قوعامدىق-ساياسي وزگەرىستەر كەزەڭى بەينەلەنگەن. 

• "جۇلدىزدار توعىسقاندا"

شىعۋ ۋاقىتى: 28 ءساۋىر 2016 جىل. بيۋدجەت: 3 600 000 دوللار (1 ملرد 852 ملن تەڭگە). كاسسالىق ءتۇسىم: 54 367 دوللار (27 ملن تەڭگە). رەجيسسەرى: سەرگەي سنەجكين

العاشقى ءۇش ءفيلمنىڭ رەجيسسەرى رۇستەم ابدىراشيەۆ بولسا، بۇل ءفيلمدى رەجيسسەر سەرگەي سنەجكين ءتۇسىردى. تۋىندى 1984–1991 جىلدار ارالىعىنداعى ماڭىزدى ساياسي وقيعالاردى قامتيدى. نازاربايەۆتىڭ قازاق كسر مينيسترلەر كەڭەسىنىڭ ءتوراعاسى بولىپ تاعايىندالۋىنان باستاپ، تاۋەلسىز قازاقستان رەسپۋبليكاسىنىڭ پرەزيدەنتى بولىپ سايلانعانعا دەيىنگى ارالىقتى كورسەتەدى.

• "ەلباسى جولى. استانا"

شىعۋ ۋاقىتى: 16 جەلتوقسان 2018 جىل. بيۋدجەت: 2 600 000 دوللار. كاسسالىق ءتۇسىم: 48 477 دوللار. رەجيسسەرى: اقان ساتايەۆ

فيلم قازاقستاننىڭ جاڭا استاناسىن كوشىرۋ تۋرالى شەشىم قابىلداعان كەزەڭگە ارنالعان. نازاربايەۆتىڭ ەلوردا سالۋ يدەياسىن جۇزەگە اسىرۋ جولىنداعى قيىندىقتارى، قارسىلىقتار مەن سىندارعا توتەپ بەرۋى سۋرەتتەلەدى. 

باسىلىم مالىمەتىنشە، نازاربايەۆ تۇسىرىلگەن بارلىق بەس فيلمگە جالپى العاندا 14،2 ملن دوللار (7 ملرد 203 ملن تەڭگە) بولىنسە، كاسسالىق تابىسى بار جوعى 624 897 دوللار (321 ملن تەڭگە) بولعان.