ءماجىلىس دەپۋتاتى ەرمۇرات باپي ەكسپو ىسىنە قاتىستى باس پروكۋرور بەرىك اسىلوۆقا دەپۋتاتتىق ساۋال جولدادى، – دەپ حابارلايدى Dalanews.kz.
دەپۋتاتتىڭ سوزىنشە، جۋىردا ءبىرقاتار ينتەرنەت رەسۋرستا بۇرىنعى ەكسپو-2017 ۇلتتىق كومپانياسى باسقارماسى ءتوراعاسىنىڭ ەكس-ورىنباسارى مۇرات وماروۆتىڭ سۇحباتى جاريالانعان.
"ول كەزىندە ەلدىڭ قۇقىق ورگاندارى مەن قازاقستاندىق مەديا "جەر جارعان جەمقورلىق شىرعالاڭى" دەپ اتاعان ەكسپو ءىسى بويىنشا 14 جىلعا سوتتالعان باسقارما ءتوراعاسى تالعات ەرمەگيايەۆپەن بىرگە 4،5 جىلعا قامالىپ، شارتتى مەرزىممەن بوساپ شىققان ەدى.
تاعى دا دەپۋتات ارىپتەستەرىمنىڭ ەسىنە سالايىن، رەسمي دەرەكتەر بويىنشا ەكسپو-نىڭ قۇرىلىسىنا مەملەكەتتەن 565 ملرد 100 ملن تەڭگە (سول كەزدەگى باعام بويىنشا 2،1 ملرد دوللار) بولىنگەن ەدى. ەكسپو ءىسى بويىنشا وسى قاراجاتتىڭ (جالپى جيىنى) 10 ميلليارد 200 ملن تەڭگەسى تالان-تاراجعا ءتۇستى دەگەن جەلەۋمەن 23 ادام جازاعا تارتىلعان-دى"، - دەدى ول.
دەپۋتات جوعارىدا ايتىلعان سۇحباتتا "ەكسپو جەمقورلىعىنا" قاتىستى جاڭا جاعداياتتار جاريا ەتىلگەنىن جەتكىزدى.
"ەڭ باستىسى سۇحبات سپيكەرى وماروۆ مىرزا بۇل جەمقورلىقتى "ساۋساقتان سورىلعان"، جالعان جانە جاساندى دەرەكتەر نەگىزىندە "قارا جىپپەن كوكتەلىپ" جۇرگىزىلگەن ءىس دەپ، باس پروكۋراتۋرا مەن كەزىندە قايرات قوجامجاروۆ باسقارعان انتيكور اگەنتتىگىن اشىق ايىپتايدى. "ءيا، ەكسپو-دا جەمقورلىق قىلمىس بولعان، ءبىراق ول جەمقورلىقتى ۇلتتىق كومپانيانىڭ باسقارماسى ەمەس، ەلدىڭ كەزىندەگى ساياسي باسشىلىعى تاعايىنداعان باسقارما باستىعىنىڭ كەڭەسشىسى جاساعان" دەيدى سۇحباتتىڭ سپيكەرى. سوتتالۋشىلار كەزىندە اشىق ايتۋدان قايمىققان ول كەڭەسشىنىڭ ءاتى-جونى – ايدوس ەسپولوۆ. ونى "انىقتالماعان تۇلعا" دەپ، قىلمىستىق ءىستىڭ فيگۋرانتتارى قاتارىنان الىپ تاستاۋعا ىقپال ەتكەن ەكس-پرەمەر-مينيستر كارىم ءماسىموۆ پەن انتيكوردىڭ ەكس-توراعاسى قايرات قوجامجاروۆ دەپ كورسەتەدى سۇحبات بەرۋشى.
مىنە، سۇحباتتا ايتىلعان باسقا ايىپتاۋلاردى ەسەپكە الماعاندا، قوعامعا كەڭىنەن تاراعان وسى جازعىرۋعا قاتىستى ءتيىستى ورگاندار تاراپىنان جاۋاپ بەرىلۋى ءتيىس ەدى. ءبىراق ءبىزدىڭ باس پروكۋراتۋرا مەن انتيكوردىڭ رەسمي وكىلدەرى اۋىز اشپادى"، - دەدى ول.
ەرمۇرات باپي مەملەكەتتىك كۇشتىك ورگانداردىڭ قىزمەتىنە كولەڭكە تۇسىرەتىن، ازاماتتارعا قاتىستى قۋدالاۋ فاكتىسى بار جەكەلەگەن قىلمىستىق ىستەر "قولدان جاسالادى" دەگەن ايىپتاۋدان كەيىن جانە وسى ىسكە بايلانىستى قوعام تاراپىنان ءتيىستى ورگانداردىڭ ءىس-قيمىلىنا كۇدىك تۋعان سوڭ، وسى سۇحباتتا اتالعان جاڭا دەرەكتەردى پىسىقتاۋ ماقساتىندا سۇحبات بەرۋشى مۇرات وماروۆپەن، ونىڭ جانە تالعات ەرمەگيايەۆتىڭ ادۆوكاتتارىمەن بىرنەشە كەزدەسۋ وتكىزگەن. جالپى جيىنى 500 تومنان تۇراتىن قىلمىستىق ءىس كوشىرمەسىنىڭ نەگىزگى مومەنتتەرىمەن تانىسقان.
"بۇل جاعداياتتى "جاڭادان جاريا بولعان جاعداي" (ۆنوۆ وتكرىۆشيەسيا وبستاياتەلستۆو) دەپ باعالاي وتىرىپ، سۇحباتتا ايتىلعان دەرەكتەر نەگىزىندە باس پروكۋراتۋرا تاراپىنان مىناداي سۇراقتار توڭىرەگىندە جاڭادان تەكسەرىس جۇرگىزىلۋىن سۇرايمىن:
- سول كەزدەگى ەل باسشىلىعى باسقارما ءتوراعاسىنا "كەڭەسشى" رەتىندە قوسىپ بەرگەن جانە سۇحباتتا ايتىلعانداي، "پارانى بىرنەشە رەت قىتايدىڭ الا سومەكەسىمەن العان" ادام كىم؟ ايىپتالۋشىلار تەرگەۋ بارىسىندا جانە سوت پروسەسسى كەزىندە ءاتى-جونىن اتاپ، ودان جاۋاپ الۋ تالاپ ەتىلسە دە، "انىقتالماعان تۇلعا" رەتىندە ول ادام قىلمىستىق ىستەن نەگە الىنىپ تاستالدى؟
- ايىپتاۋ قورىتىندىسى مەن سوت ىسىندە زاڭسىز سىياقى العان "انىقتالماعان تۇلعانىڭ" ءاتى-جونى ءوشىرىلىپ، ونىڭ ورىنىنا ەشقانداي دالەل-دايەكسىز تالعات ەرمەگياۆتىڭ سوتتالۋىنا بايلانىستى پروكۋرورلىق باعا بەرىلۋى ءتيىس دەپ ەسەپتەيمىن!
- تەرگەۋدىڭ ناتيجەسىندە 23 بىردەي ازاماتتىڭ قىلمىستىق جاۋاپكەرشىلىككە تارتىلۋىنا جەلەۋ بولعان پارا بەرۋشى "سەنىمدى وكىل" كىم؟ تەرگەۋ بارىسىندا جانە سوت كەزىندە پارا بەرۋشى ادامنىڭ انىقتالماعانى قالاي؟ پارانى الۋشى بار، ال بەرۋشى كىم؟
- باسقارما باسشىسىنا پارا بەرۋ فاكتىسىنە قاتىسى بار دەپ قىلمىستىق ىستە كورسەتىلگەن، ءبىراق پسيحيالىق اۋرۋ رەتىندە تىركەۋدە تۇرعان ادامنىڭ تەرگەۋ مەن سوتقا كۋاگەر رەتىندە تارتىلۋى زاڭدى ورەسكەل بۇزۋ فاكتىسى. (ءبىر قىزىعى جۇيكە اۋرۋىنا ۇشىراعان بۇل كۋاگەر سوتقا دەيىن اۋرۋلار تىزىمىنەن شىعارىلىپ، سوت بىتكەن سوڭ قايتادان ەسەپكە الىنعان).
- ەكسپو قۇرىلىسىنىڭ تەحنيكالىق-ەكونوميكالىق نەگىزدەمەسىن جاساعان "رونا" سەرىكتەستىگىنىڭ (ج ش س) باسشىلىعى ەكسپو-دان تۇسكەن قاراجاتتى وفشورعا اۋدارىپ جاتقانى تەرگەۋ بارىسىندا جانە سوت بارىسىندا نەگە نازارعا الىنبادى؟" - دەدى دەپۋتات.
"ادىلەت ەشقاشان جارتىكەش بولمايدى. "ادىلەتتى قازاقستان" يدەياسىن قالىپتاستىرۋ ءۇشىن اقيقاتتى انىقتايتىن كەز كەلدى. بۇل سياقتى "پارا بەرۋ" جانە "جەمقورلىق" جەلەۋىمەن قۋدالانعان، ال انىعىندا كەزىندەگى جەكە دارا بيلىك "قولىنان جەتەكتەپ اپارىپ سوتتاتقان" تۇلعالاردىڭ قاتارىندا ارعىسى اكەجان قاجىگەلدين مەن عالىمجان جاقيانوۆتان باستاپ، بەرگىسى سەرىك احمەتوۆ پەن جاقسىلىق دوسقالييەۆقا دەيىن ءبىرقاتار قياناتتى ءىس بار. باس پروكۋراتۋرا بۇلاردى دا تولىق رەابليتاسيا جاساۋعا باستاما جاسايتىن ۋاقىت بولدى دەپ ەسەپتەيمىن!
ال "ەكسپو ىسىنە" قاتىستى اقيقات تولىعىمەن انىقتالىپ، ناقتى جازىقتىلار جاۋاپقا تارتىلىپ، بەيكۇنالار اقتالۋى ءتيىس! سوندىقتان وسى دەپۋتاتتىق ساۋالدا كوتەرىلگەن دەرەكتەر بويىنشا "ەكسپو ىسىنە" قايتادان ورالىپ، ەلدىڭ باس پروكۋرورى رەتىندە سوت ۇكىمىنە "پروتەست" بەرۋىڭىزدى سۇرايمىن!" - دەدى ول.
