الماتى وبلىسى اكىمىنىڭ ءبىرىنشى ورىنباسارى قانات ەسبولاتوۆ مۇگەدەك جاندار تۋرالى ايتقان ءسوزىن ءتۇسىندىرىپ بەردى، دەپ حابارلايدى Dalanews.kz.
ەسبولاتوۆ دەنساۋلىق ساقتاۋ مينيسترىمەن تالعاردا وتكەن كەزدەسۋگە قالىڭ جۇرت جينالعانىن، ءارقايسىسى وزەكتى ماسەلە كوتەرىپ، سۇراق قويۋعا اسىققانىن اتاپ ءوتتى. سوندىقتان كەزەك تە ۇلكەن بولعان.
"رەگلامەنت بويىنشا كەزدەسۋگە ەكى ساعات بولىنگەن ەدى. ءبىراق، سۇراقتاردىڭ كوپ بولۋىنا بايلانىستى جيىن شامامەن 4 ساعاتقا سوزىلدى. كەلگەن ازاماتتاردىڭ اراسىندا ءبىرقاتار مۇمكىندىگى شەكتەۋلى جان بولدى. كەيبىرى تىك تۇرىپ، ءوز كەزەگىن كۇتتى. كەزەگى جەتكەندە زالداعى بىرنەشە ادام ءسوزىن ءبولىپ، وعان كەدەرگى جاساي باستادى. رەگلامەنتتى ساقتاۋعا شاقىردىم. الايدا ورىس تىلىندە ايتقان سوزىمدە قاتەلىك بار. ويىمدى دۇرىس جەتكىزبەپپىن. “قۇداي ۇلكەن سىناق بەرگەن” دەپ ايتپاق بولعانمىن.
ايتقان ءسوزىم كوپشىلىكتىڭ كوڭىلىنە، ءتىپتى نامىسىنا تيگەنىن دە ءتۇسىندىم. وسى ءۇشىن شىن نيەتىممەن كەشىرىم سۇرايمىن"، - دەيدى شەنەۋنىك.
قانات ەسبولاتوۆ اۋقىمدى ءىس-شارالاردا الدىمەن ەگدە جاستاعى تۇرعىندارعا جانە مۇمكىندىگى شەكتەۋلى ازاماتتارعا جول بەرۋ ماڭىزدى ەكەنىن ايتادى.
"قاي جيىن بولماسىن، ولاردى كوپ كۇتتىرمەي، كەزەكسىز تىڭداۋ – دۇرىس ءارى ادامگەرشىلىككە ساي دەپ ەسەپتەيمىن. سىزدەردىڭ پىكىرلەرىڭىز بەن رەاكسيالارىڭىز مەن ءۇشىن وتە ماڭىزدى. جيىندا كوتەرىلگەن ءار سۇراقتى اكىمدىك پەن مينيسترلىك نازارعا الدى، كوپشىلىگىنە سول جەردە جاۋاپ بەرىلدى. قوسىمشا پىسىقتاۋدى قاجەت ەتەتىن ماسەلەلەر حاتتاماعا ەنگىزىلىپ، باقىلاۋعا الىندى. مينيسترلىكپەن بىرگە بۇل باعىتتاعى جۇمىستى جالعاستىرامىز.بەلسەندىلىك تانىتقاندارىڭىز ءۇشىن بارشاڭىزعا تاعى دا العىس ايتامىن"، - دەيدى اكىمنىڭ ءبىرىنشى ورىنباسارى.
ايتا كەتەيىك، اڭگىمە الماتى وبلىسىندا دەنساۋلىق ساقتاۋ ءمينيسترى اقمارال ءالنازاروۆانىڭ حالىقپەن كەزدەسۋىندە بولعان وقيعا جايلى بولىپ وتىر. وبلىس اكىمىنىڭ ءبىرىنشى ورىنباسارىنىڭ مۇمكىندىگى شەكتەۋلى جاندار تۋرالى ايتقان ءسوزى جۇرتتىڭ اشۋىنا تيگەن ەدى.
ول حالىقتى سابىرعا شاقىرىپ، ارتىنشا مۇمكىندىگى شەكتەۋلى جاندار تۋرالى ايتقان.
"مۇگەدەكتەردىڭ ەڭسەسىن تۇسىرمەيىك. ونسىز دا اللا تاعالا بۇل كىسىلەردى، ورىسشا ايتقاندا، "يح ناكازالي". سىيلايىق. سول ءۇشىن قۇداي باستارىڭىزعا سالماسىن. قول-اياقتارىڭىز تۇگەل، اۋرۋ ەمەسسىزدەر، وسى كىسىلەردى قابىلداسىن"، - دەگەن ەدى شەنەۋنىك.
