Министр ауылда әупірімдеп интернетке әрең қосылғанын айтты

Dalanews 19 мау. 2021 14:27 143

ҚР цифрлық даму, инновациялар және аэроғарыш өнеркәсібі министрі Бағдат Мусин Қарағандыдағы Баймырза деген ауылға барып, ауыл мектебінің «Қазақтелекомның» талшықты оптикалық кабліне жалғанбағанына біліп таңқалып қайтыпты. Ол бұл жайында өзінің Фейсбуктағы парақшасында жария етті, – деп хабарлайды Dalanews.kz.

– Жуырда Қарағанды облысы Баймырза ауылының тұрғындары маған байланыс сапасына шағымданды. Бүгін интернетті тексеру үшін осы ауылға екі рет соқтым, таңертең және кешке.

Кешкі тексеріс байланыс сапасының төмендігін көрсетті. Теле2 мобильді интернетінің орташа жылдамдығы секундына 0,34 мегабит екен. Beeline-ға тіпті қосыла алмадық, ал Kcell-ге әрең қосылдық – 60 рет жасалған талпыныстың 24-і ғана ақталды.

Теле2-нің ауылда орналасқан базалық стансасында трансмиссия ретінде радиорелелік қосылыс қолданылады, ал екі адым жерде «Қазақтелекомның» талшықты оптикасы жатыр. Жылдамдықты өлшеу нәтижелері негізінде әкімшілік хаттамалар жасалды, соған сәйкес олқылықтарды үш ай ішінде жоюлары тиіс.

Екінші мәселе, мектепте интернет бар ма деп сұрағанымда, ауыл әкімі «мобильді интернет қолданады» деді! Оның сапасы жайлы жаңа айтқан болатынмын. Осы жерде тағы қайталаймын, ауылға оптика тартылған! Сұрастыра келе, Білім басқармасы мектепке интернет қосуға өтінім бермегені белгілі болды.

Десек те, кешке қарай сапардан қайтар жолда естідік, шұғыл түрде өтінім жолданғандықтан, «Қазақтелеком» жергілікті мектепке 20 мегабит/сек жылдамдықты интернет қосып үлгеріпті.

Ұсынылған
Соңғы жаңалықтар
x