Cоңғы жаңалықтар
Back

Тоқаевтың уәдесі: Қазақстанда балалардың арнайы шоты қашан ашылады?

«Балаларға арналған ұлттық қор» аясындағы бастама Қазақстанның 18 жасқа толмаған барлық азаматтарын қамтиды.

Ал ол 2024 жылдан бастап жүзеге асады.

Қаражат жыл сайын есептеліп, баланың шотына түсіп отырады. Бұл шот таяу арада ашылады. Бірақ оны бала кәмелет жасына толғаннан кейін ғана қолдана алады

Шот операторы — “Біріңғай жинақтаушы зейнетақы қоры”.

Бұл жайында 14 желтоқсанда үкімет отырысында Ұлттық экономика вице-министрі Тимур Жақсылықов мәлім етті.

Бұған дейін Президент Тоқаев Ұлттық қордың жылдық инвестициялық кірісінің 50 пайызын балалардың шотына аударатынын мәлімдеген. Жинақ шотындағы ақшаны олар кәмелетке, яғни 18-ге толғанда ғана ала алады.

“Әрбір отбасы елдің ұлттық байлығын пайдаланғаны үшін нақты табыс алуы керек. Сондықтан мен жариялаған Балалар жылы аясында жаңа “Балаларға арналған ұлттық қор” бағдарламасын іске қосуды аса маңызды деп санаймын.

Кәмелеттік жасқа толғаннан кейін олар жинақталған соманы тұрғын үй сатып алуға және білім алуға жұмсай алады.

Бұл қаражат өскелең ұрпаққа кәмелеттік жасқа шын жолдама береді. Қор шынымен де ұлттық мәртебеге ие болып, халық игілігіне қызмет ететін болады. Осы ауқымды істі жан-жақты зерделеу қажеттілігін ескере отырып, жобаны 2024 жылдың 1 қаңтарынан бастап іске қосуды тапсырамын”, — деген болатын Президент.

Бұл ретте Президенттің баспасөз хатшысы Руслан Желдібай да Facebook-те арнайы жазба қалдыр­ған.

«Президенттің бастамасымен Балалар жылының аясында «Ұлт­тық қор – балаларға» атты жаңа бағ­дарлама іске қосылады. Оған сәй­кес, 2024 жылдан бастап Ұлттық қор­дың жыл сайынғы инвестициялық табысының 50 пайызы балалар 18 жасқа толғанға дейін олардың арнау­лы жинақтаушы есепшотына аударылады.

Жинақталған қаржы балалар кәмелет жасына толғаннан кейін олардың баспана немесе білім алуына жұмсалады. Үкімет пен Ұлттық банктің есебі бойынша елімізде жыл сайын 400 мың сәби дүниеге келеді. Әр бала 18 жасқа толғанша олардың есепшотында кемі 3 мың АҚШ долларына тең қаражат жиналады», делінген оның жазбасында.

Тағы оқыңыз:

“Жайлы мектеп” ұлттық жобасы бойынша Астанада 45 мектеп салынды

Алматыда мемлекеттік-жекеменшік cеріктестік аясында 188 балабақша ашылады