Cоңғы жаңалықтар
Back

«Тарихшының бәрі, Шыңғысхантанушы болып кетті». Тоқаев бос сөздің күні өткенін айтты

Бүгін Мемлекет басшысы Қасым-Жомарт Тоқаев Алматыда жұртшылықпен кездесуде Шыңғысхан қай рудан деген бос сөзді қойып, нақты іспен айналысатын кезеңге аяқ басқанымызды айтты, – деп хабарлайды Dalanews.kz.

– Мен академик Асқар Жұмаділдаев айтқан пайыммен толық келісемін. Халқымыз осындай күрделі заманда ең алдымен, әлемге прагматикалық көзбен қарауы керек.

Бос әңгімелерді тоқтату қажет. Мысалы, Шыңғыс хан қай рудан шықты деген талас-тартысты қою керек деп ойлаймын.

Қазіргі таңда зиялы қауымның кейбірі шетінен тарихшы, шыңғыстанушылар болып кетті. Мұның қоғамымызға пайда әкелеріне күмәнім бар.

Жастарымыздың санасы сергек, еті тірі, ширақ болуы қажет.

Көрші мемлекеттердегі жас азаматтар шетелге барып, кәсіпорындар, дүкендер ашып, жақсы өмір сүру үшін жаңа дағдыларды игеріп жатыр.

Олар, шын мәнінде, бәсекеге қабілетті, еңбекқор адамдар. Қазіргі жағдайда мен бір жерде өмір сүремін, туыстармен өмір бойы бірге тұрамын деген ұғым әбден ескірген.

Сондықтан, құрметті ағайын, бәріміз озық болайық! Сонда ғана жастарымыздың көзі ашық, көкірегі ояу, ойлары ұшқыр болады, көптеген сын-қатерге төтеп бере алады. Өз жағдайын өздері жасап, жақсы өмір сүре алады, – деді Мемлекет басшысы.