Бажкенова: "Олар орысша білмегені үшін қаңғып жүр"

Dalanews 15 қаң. 2018 05:06 167

Олар өзгермейді екен. Осы кеткені кеткен. Олар өз ішімізден шыққан. Жау деуге аузымыз бармайды. Бірақ, соған жақын. Олар бет бақтырмайды. Адасқандармен алысқаннан қайыр жоқ, түсінгеніміз. 

Әлеуметтік желіні шарлап отырып саясаттанушы Айдос Сарым мен журналист, Esquire.kz сайтының бас редакторы Гульнара Бажкенованың арасындағы пікірталасты көзіміз шалды. Қарап шықтық. «Азаттық» шақырған екен екеуін. Тіл тақыбыры. Ұлт мәселесі. Бұларға қатысты қазақтілді және орыстілді ортаның көзқарасы. Біраз дүниенің басын шалыпты.

Екеуі ұзақ дауласты. Екі дүниетанымның өкілдері ала-алмады бір-бірін. Бажкенова бой бермейді. Орыс әлемінің, орыстілді әлемнің өкілі санайды өзін. Соның туын көтеріп, соның сөзін сөйлейді. Сөз саптасынан ұққанымыз орысша білмейтіндер бақытсыз. Бұл өмірде мақсатына жете алмайды. Кедейлікте өмір сүреді.
Шыны керек, мұншалықты сорақы пікірді естімеппіз…

«Мен бұдан бұрын Алтынбесік деген шағынауданға бардым. Осындағы лашықтарда аумағы 5 шаршы метрден аспайтын бөлмелерде 5-6 адамнан тұрады екен. Не дүние-мүлік жоқ, не басқа жоқ. Әйтеуір сыз өтпеу үшін астыларына жайған көрпе-жастықтары бар. Бұл жастар кім? Бұлар орысша білмейтін жастар», – дейді Бажкенова.

Сарым сөзін бөлді оның.

«Сонда сіз олар орысша білмегендері үшін бақытсыз, жұмыссыз деп ойлайсыз ба?»

«Әрине, басқа қандай себеп бар?
Олар қазақ мектебін бітірген. Орыс тілін білмейді. Орыс тілін білмеуі себепті көпшілігі қара жұмыста жүр. Екі қолға бір күрек тапқанына қуанады. Әрі кетсе, күзетші болады. Ал электрика, техника жағында барлығы орыстілділер»

–  дейді Бажкенова.

Иә, Гульнара солай ойлайды. Шындықты айттым деп ойлаған шығар. Шындықты айтқанда болуы мүмкін.
 

Мәселе бұл арада Бажкенова жастарға жаны ашып тұрған жоқ, орыс тілінің сойылын соғып, сөзін сөйлеп отыр.

Өзі сондай тоқтамға келген. Сарыммен арадағы сөзталаста сол пікірін жарнамалап үлгерді. Көрдіңіз бе?

Мұндай адаммен сөз таластыру мүмкін бе? Орыстың дүниетанымымен өмір сүретін, қазақи құндылық атаулыдан ада Бажкенова әлгі жастардың  жұмыссыз жүруіне, өмірден өз орнын таппауына орысша білмеуін себеп санаса, ендеше, одан қайыр жоқ.

Ол үшін орыс тілі ана тілі.
Ол орыс тілінің сақталуы үшін күреседі, ендеше.

Бәлкім, қаны қазақ шығар. Бірақ, ұстанымы жат, жолы бөлек. Бөтен. Орыс емес, қараорыс. Ең қиыны, осы. Өз ішіңнен шыққаны…

 

Думан БЫҚАЙ 


https://youtu.be/prZTzytNBX8

Ұсынылған
Соңғы жаңалықтар
x