Cоңғы жаңалықтар
Back

“Путин әскерін қоршауға аламыз…”. Украина қарсы шабуылға шықты

Украина күштері оңтүстікте Ресей жаулап алған жерлерді қайтару үшін қарымта шабуылға көшті.

Бұл уақытта Ресей Украинаның орталық аймақтары мен астана маңындағы аудандарды атқылады. Дегенмен Мәскеуге шығыстағы ұрыстарда сарбаз жетпей жатқаны мәлім болды.

Украин әскерилерінің мәлімдеуінше, әуе күштері Ресейдің Херсон түбіндегі бес бекінісі мен қалаға жақын маңдағы тағы бір бекінісіне соққы жасаған. Ресей әскерін Херсон түбінде қоршауға алуды көздеген Киев соғыс басталғалы бері ең ірі қарымта шабуылын жүргізіп жатыр.

Кейінгі апталарда Украина Батыс жеткізген зымыран кешендерін қолданды. Соның көмегімен Днепрдегі үш көпірге соққы жасалып, өзеннің батыс жағындағы ресейлік әскерге көмек жеткізу қиындады.

Мәскеу аннексиялап алған Қырыммен шекаралас Херсон облысын Ресей күштері 24 ақпанда соғыс басталған кезде басып алған.

28 шілдеде Ресей Украинаның орталық бөлігіндегі Кировград облысын әуеден соққылады. Соның салдарынан Кропивницк қаласында бес адам опат болып, 26 адам жараланды. Киев түбіндегі әскери базада 15 адам зардап шекті. Украинаның солтүстік және оңтүстік аймақтары да әуеден атқыланды.

Кремль 24 ақпанда Украинаға басып кірер алдында ол жақтан құпия тыңшылар желісін құрған. Бейсенбі күнгі Reuters агенттігінің зерттеуінде осылай делінген.

Reuters агенттігінің дереккөзіне қарағанда (агенттік Кремльдің соғыс ашу жоспары болғанын білген бес адамға сілтеме жасайды), Ресей президенті Владимир Путин тыңшылар желісі Владимир Зеленский әкімшілігінің биліктен бас тартып, шетелге қашып кетуіне ықпал жасайды деп сенген.

Алайда, бұл жоспары орындалмаған. Қазір Украинада соғыс жүріп жатқанына бес ай өтті. Украина біраз аумағынан айырылса да, қарсылық танытуды жалғастырып жатыр.

Украина Ұлттық қауіпсіздік кеңесінің басшысы Алексей Даниловтың айтуынша, әскерилер мен арнайы қызметтің арасында Ресей тыңшылары болған.

Атап айтқанда, соғыстың алғашқы күні Чернобыль АЭС-тың күрессіз берілуі де ресейлік агенттердің әрекеті болған.

Қазір АЭС-тің бұрынғы қауіпсіздік қызметінің жетекшісі Валентин Витер мен арнайы қызметтің лауазымды тұлғалары мемлекетке сатқындық жасады деген күдікке ілінді.

Reuters мәліметінше, Мәскеу Украина билігін толық ауыстыруды жоспарлап, үкіметті Жоғарғы раданың бұрынғы ресейшіл депутаты, 2014 жылдан бері Ресейде тұратын Олег Царёв басқарады деп ойлаған.

Ол Ресейдің Украинаға басып кіруін толық қолдап, мәлімдеме жасады.

Былайша айтқанда, Ресейдің Украинаға қатысты жоспары жүзеге аспай қалды. Даниловтың сөзінше, Мәскеу Украинаның әлсіз тұстарын есептеп, құпия тыңшыларын қатты бағалап жіберген.

Тағы оқыңыз:

Алматы облысының әкімі сингапурлық «Surbana Jurong» компаниясының өкілдерімен кездесті