Cоңғы жаңалықтар
Back

Түркістанда премьера! «Фариза» спектаклі сахналанады

Түркістан музыкалық драма театрында қазан айының 23-24 күндері «Фариза» спектаклінің премьерасы қойылады. Идея авторы және көркемдік жетекшісі Айнұр Көпбасарова сахналық қойылымның өзге туындылардан айтарлықтай ерекшелігі бар екенін жеткізді, – деп хабарлайды Dalanews.kz Түркістан облысының Өңірлік коммуникациялар қызметіне сілтеме жасап.

«Фариза» спектаклін қоюдағы басты мақсат – өрелі ақын, қоғам қайраткері, елімізге танымал тұлғаны халыққа терең таныту, қоғамды әдеби-мәдени тұрғыда байыту, жастардың интеллектуалдық белсенділігін дамыту, театр сахнасында техникалық мүмкіндіктерді пайдалана отырып көрерменнің қызығушылығын арттыру.

– Бұл – спектакль көрерменнің назарын аудару әдісімен, заманауи технологиялық құрылғыларымен, айрықша декорациямен, сахна көңіл-күйіне сәйкес арнайы жазылған музыкамен ерекшеленеді. Пьеса қазақ тілінде қойылады, орыс тіліне ілеспе аударма жасалады, – деді А.Көпбасарова.

Басты рөлдегі кейіпкерлерді «Дарын» мемлекеттік сыйлығының лауреаты Назгүл Қарабалина, Қазақстанның еңбек сіңірген қайраткері Қуандық Қыстықбаев, Қазақстанның еңбек сіңірген қайраткері, «Парасат», «Құрмет» ордендерінің иегері Лейла Бекназар-Ханинга және Ерлан Кәрібаев сомдайды.

Айта кетейік, «Фариза» спектаклі бар болғаны көрермен назарына төрт рет ұсынылған. Алғаш рет Алматы, Мәскеу қалаларында, сондай-ақ елордамыз Нұр-Сұлтанда қойылған. Шыншыл да сыршыл өлеңдерімен жұрттың жүрегіне жол тапқан, адалдығы мен ақындығы тең түсетін, қайсар да қайталанбас талант иесі – Фариза Оңғарсынованың өмірі мен өлеңі туралы пьесаны «A+A Idea Fabric» продюсерлік орталығының тапсырысымен драматург Роза Мұқанова жазып шықты.

Тағы оқыңыз:

Әжелер киіз басудан жарысты