Back

Қазақстан мұнайдың 70 пайызға жуығын Теңіз, Қарашығанақ және Қашағаннан өндіріп отыр

Экология, геология және табиғи ресурстар вице-министрі Серікқали Бірекешев Қазақстандағы минералды-шикізат қорының бүгінгі хал-ахуалы туралы мағлұмат берді, деп хабарлайды Dalanews.kz. 

Оның айтуынша елімізде тұтастай алғанда 317 мұнай кен орны бар. Мұндағы шикізаттың қоры 4,4 млрд тоннаға жуықтайды.

“Елімізде қойнауында пайдалы қазбалары бар 8 мыңға жуық кен орындары тіркелген. Бұлардың ішінде көмірсутек қоры – 317 (мұнай және газ),  ел аумағында кеңінен таралған пайдалы қазбалар – 3 мыңнан астам және 900-ге тарта қатты пайдалы қазбалар шоғыры бар. Бұдан бөлек 4 мыңға жуықтап қалатын жерасты суының кен орны бар”, – деді Бірекешев ОКҚ-да баспасөз жиынында

Вице-министрдің атап өткеніндей Қазақстандағы “қара алтынның” негізгі бөлігі еліміздің Батыс өңірлерінде шоғырланған.

Нақтылап айтқанда мұнай қорының 75 пайызы Атырау облысына, 11 пайызы Маңғыстау өңіріне тиесілі.

“Еліміздегі мұнайдың 68 пайызын Теңіз, Қарашығанақ және Қашағаннан алып отырмыз. Қазіргі күні мұнайдың қоры А+В+С1+С2 дәрежелері бойынша 4,4 миллиард тоннаны, газдың қоры – 3,8 триллион текше метрді, ал конденсат – 415 миллион тоннаны құрайды”, – деді өз сөзінде ведомство өкілі.

Вице-министр осы жиында елдің назарын аударар басқа да мәселелерді сөз етті. Мәселен, оның айтуынша еліміздің мұнай қоры ортайып қалған. “Қара алтынның” кемігенін Қашаған ғана білдіртпей тұр.

Бұл туралы төмендегі сілтемеден оқи аласыз.

Мұнай қоры ортайып барады, тездетіп барлау жұмысын бастау қажет – Вице-министр