Back

Мұнай-газ химиясымен байланысты жобаларға қомақты қаржы құямыз – министр Ноғаев

Елімізде құны 12 млрд долларды құрайтын мұнай-газ химиясы жобалары жүзеге асатын болады. Бұл жайында Қазақстанның Энергетика министрі Қазан қаласында өтіп жатқан мұнай-газ форумында айтты деп хабарлайды Dalanews.kz.

Татарстан астанасында өткен мұнай-газ мәжілісінде көлемді баяндама жасаған Нұрлан Ноғаев одақтас елдер (Қазақстан мен Ресей) арасында экономиканың негізгі бағытының бірі – мұнайгаз-химиясы саласында берік байланыс орнағанын мәлімдеді.

“Сөзіме дәлел биылғы жылы еліміздің ірі мұнай-газ компаниясы “ҚазМұнайГаз” бен “Татнефтьтің” арасында бутадиен және оның өнімін өндіруі бойынша бірлескен іс-қимылдың шарттары туралы құжатқа қол қойылды”, – деді Нұрлан Ноғаев.

Бұл жоба бойынша инвестиция көлемі 820 млн долларды құраған, жобаның аяқталу уақыты – 2026 жылға белгіленген.

Зауыттың өнімі Ресейге, Батыс елдеріне, Қытай және Түркияға жеткізіледі деп жоспарланып отыр.

Қазіргі таңда елімізде хош иісті көмірсутектер, полипропилен және де жанармайға арналған октанды қоспаларды өндіретін зауыттар нәтижелі жұмыс істеуде.

Бұлар жасап шығаратын өнім өз ішімізде аса жоғары сұранысқа ие, сонымен қатар Ресей, Қытай және Орта Азия елдеріне экспортталады.

Бұдан бөлек Қазақстанда қуаты жылына 500 мың тоннаны құрайтын, құны 2,6 млрд долларға бағаланған полипропилен өндіретін кәсіпорынның құрылысы басталып кетті.

Сондай-ақ келесідей өндірістік жобалар түрлі даму сатысында тұр, атап айтқанда:

– Метанол (жылына 120-130 мың тонна, құны 200 млн доллар);

– полиэтилен (жылына 1,200 млн тонна, ал құны 7,6 млрд доллар);

– олефиндер (жылына 800 мың тоннаға жуық/ құны 1,8 млрд доллар);

– полиэтилен-терефталат (жылына 1 млрд долларға 425-435 мың тонна);

– негізгі май өнімдері (жылына 280 мың тонна, құны 860 млн доллар).

Осынау жобалардың тұтас құны 12 млрд долларды құрайды.

«Үкімет осы бағыттағы жобаларды демеу үшін мемлекеттік қолдауды барынша қамтамасыз етеді. Елбасымыз Қазақстандағы мұнайгаз-химия саласының өркендеуіне бастамашы болды. Президент Қасым-Жомарт Тоқаев өз тарапынан осы саланы жетілдіруге қатысты үнемі жаңа міндет қойып келеді.

Қазіргі таңда Қазақстан Үкіметі мұнайгаз-химия саласы бойынша арнайы инвесткелісім әзірлеу үстінде, құжатта саланы дамытуға бағытталған айрықша преференция түрлері қамтылатын болады, – деді  Энергетика министрі шараның ашылуында.

Қазан қаласын іс-сапар аясында Ноғаев дүниежүзілік ғылыми-тәжірибелік конференцияға қатысады, сонымен қатар осы саладағы әріптестерімен мұнай-химия өнімдерін пайдалануды кеңейтудің жолын іздестіреді. Сапар барысында Татарстан президенті Рустам Минихановпен кездесу жоспарланған.