Back

Ассамблея жанындағы Медиация институтының құрылғанына 5 жыл толды

Қазақстан халқы Ассамблеясының ажырамас бөлігіне айналып кеткен Медиация институты 5 жылдығын атап өтті деп хабарлайды Dalanews.kz.

Сонымен қатар биылғы жылы “Медиация туралы” заңның қабылдағанына 10 жыл толды.

Ассамблея басшылығы соңғы 5 жыл бойына Қазақстанда медиаторлар институтын қалыптастыруға көп күш салды және соның негізінде ауыз толтырып айтарлықтай нәтижеге жетті.

Жасырары жоқ, өмір болғаннан кейін түсінбеушіліктер, кикілжіңдер туындап жатуы қалыпты дүние.

Тұрмыстық деңгейдегі ұрыс-жанжал ұлтараздық конфликтіге ұласып кетпеуі үшін еліміздегі этнос өкілдері медиаторлардың көмегіне жүгінеді.

Қазір Ассамблея қатарында 2 мыңнан аса медиатор бар. Осы күнге дейін олардың алдына 130 мыңға жуық азамат арыз айтып келген, олардың дерлігі сотқа жетпей, бейбіт шешілген.

Медиация институтының бастамасымен соңғы 5 жылда еліміздегі бейбітшілік пен тұрақтылықты нығайтуға бағытталған 16 мың іс-шара өткізілген, осынау іс-шаралар 300 мыңнан аса азаматты қамтыған.

Дәл қазір Ассамблеяның қанатының астында 20 Медиация кеңесі бар. Ассамблеямен әрдайым ақылдасып отыратын кеңестер осы күнге дейін түрлі ұйымдармен меморандумға қол қойып, нәтижелі жұмыс жүргізуде.

Атап айтар болсақ, олардың арасында «Атамекен» палатасы, Адвокаттар алқасы, ҚР Адам құқықтары жөніндегі өкілдігі және басқа да мекемелер бар.

2016 жылы Ассамблеяның ұйытқы болуымен еліміздің түкпір-түкпірінде медиация кабинеттері ашыла бастады. Қазір әр аймақтағы “Қоғамдық келісім” мекемесінде медиация мәселесі бойынша үйлестірушілер бар.

Ал еліміздегі “Достық үйлерінде” 17 медиация бөлмесі орналасқан. Олар түрлі этнос өкілдері арасындағы туындаған дау-дамайды сотқа жеткізбей шешуде үлкен тәжірибе жинақтап үлгерді.