Back
Өмірзақ Шөкеев

Шөкеев Түркістан екінші даму кезеңінде қалай өркендейтінін айтты

Түркістан облысы әкімі Өмірзақ Шөкеев Түркістан қаласын дамытудың 2-кезеңіне жоспарланған жаңа жобалардың барысын пысықтады. Бұдан бөлек, аймақ басшысы көгалдандыру жұмыстарына жауапты тұлғаларға бірқатар тапсырмалар берді, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.

Түркістан қаласы дамуының 1-кезеңі аяқталғанын ескере отырып, Түркістан облысының 2021-2025 жылдарға арналған жаңа Кешенді жоспары бекітілгені белгілі.

Кешенді жоспарда 141 іс-шара енгізілді. Түркістанды дамытудың екінші кезеңінде инвестициялардың көлемі 1,3 трлн. теңге, оның 77%-ы жеке инвестициялар болып табылады.

Түркістанның дамуы 4 аумақта жүзеге асады. Халықаралық әуежай аумағында 12 жоба іске қосылады. Оның ішінде 100 орындық замануи қонақ үй, 400 гектар қара өрік бағы, 50 гектар жерге жылыжай, 10 мың бас ірі қара бордақылау кешені, 1 200 бас тауарлы-сүт өндіру фермасы салынады.

Екінші аумақтағы жұмыстар Әкімшілік-іскерлік орталығында жалғасады. Мұнда 57 жобаның құрылысы жоспарланған. Атап айтқанда теннис орталығы, мұз сарайы, ат-спорт кешені, демалыс орындары және инженерлік инфрақұрылымы.

Сондай-ақ, 4,8 млн шаршы метр тұрғын үй салып, 46 мың пәтер пайдалануға беру жоспарлануда. Денсаулық сақтау саласында 570 төсектік көпбейінді аурухана (МЖӘ), жедел медициналық жәрдем станциясы, және «Ана мен бала орталығы» салынады.

Үшінші аумаққа кіретін Б.Саттарханов даңғылының бойында спорттық кешен, Яссы желілік саябағы, ірі сауда орталықтары, 182 га универститеттік ботаникалық бақ, Парк Лайн коттедж кешені пайда болады.

Ал, 4-аумақ – Мәдени-рухани орталық. Табиғи аумақта Күлтөбе қалашығының тарихи нысандарын қалпына келтіру, «Әзірет Сұлтан» музей-қорығының аумағын абаттандыру жоспарлануда. Бұдан бөлек, «Керуен Сарай» тұрғын үй кешені, «Аманат» коттеджі қалашығы, «Medina Palace» қонақ үйі, «Хилует» мәдени-рухани орталығы салынады.

Тағы оқыңыз:

Өмірзақ Шөкеев: «Түркістанды өркендетуде ардагерлердің алатын орыны ерекше»