Back
| DalaNews

Бірінші болып вакцина қабылдаған елордалық ұстаздар өз ойларымен бөлісті (видео)

Мұғалімдер мен құқық қорғау органдарының қызметкерлері үшін 1 наурыздан бастап коронавирус инфекциясына қарсы вакцинация басталғаны белгілі. КВИ-дан алғашқы екпені елордалық №27 және №50 мектептердің мұғалімдері алған болатын. Қала бойынша алғашқы екмені алған әлеуметтік сала қызметкерлері вакцинаның әсері бөлісті, – деп хабарлайды Dalanews.kz  Нұр-Сұлтан қаласы әкімдігінің ресми сайтына сілтеме жасап.

Екпені алғашқылардың бірі болып №27 мектеп-лицейінің қазақ тілі мен әдебиеті пәнінің мұғалімі Зибагүл Қаратаева қабылдады. Осыған дейін ол дәрігердің тиісті тексерісінен өткен болатын.

– Мен вакцинацияны өз еркіммен қабылдадым. Бұл ең алдымен өзіңді және туыстарыңды қорғау үшін қажет шара. Отбасымда коронавиурс инфекциясымен ауырған ешкім жоқ және жұқтырмас үшін осындай таңдау жасадым. Бұл өз денсаулығыма деген жауапкершілік, – дейді мұғалім.

Сонымен қатар, Зибагүл Қаратаева вакцина қабылдау кезінде ешқандай қорқыныш болмағанын да айтты.

– Дәрігерлердің вакцина қабылдағаны жайлы қаншама ақпарат тарады, бәрін оқып отырдық, жағдайды назарда ұстадық. Жағымсыз жағдайлар болған жоқ. Сол себепті сенімді болдым, – деп түсіндірді мұғалім.

Вакцинаның бірінші компонентін №27 орта мектеп-лицейінің директоры Қанат Байсалбаев та қабылдады. Ол өзін жақсы сезінетінін, кері әсерлері болмағанын жеткізді.

– Егер біз инфекцияның таралуын қаламасақ, екпе қабылдауымыз қажет. Оның үстіне оқушылар біртіндеп сыныптарына оралып жатыр. Ал олардың ата-аналарымен біз күн сайын кездесіп тұрамыз. Бір-бірімізді қатерге тігуге болмайды. Мен мектеп директоры ретінде екпе алып, әріптестеріме үлгі көрсеттім, – деп атап өтті Қанат Байсалбаев.

Райымбек батыр атындағы №50 мектеп-лицейінің тарих пәнінің мұғалімі Сайлаубай Шайкенов мемлекет ұсынған тегін вакцинациядан өтуді азаматтық парызы санайды.

– Мемлекет бізге қамқорлық жасап, вакцинациялауды ұсынып отыр. Өткен жыл бүкіл адамзат үшін қиын кезең болды. Вирустың салдарынан қаншама адам қайтыс болды. Вакцинаның тиімділігіне сенбесем, бұл жерде отырмас едім. Өзімді, отбасымды және оқушыларымды қатерден қорғағым келеді, – дейді тарихшы.

 

Тағы оқыңыз:

Елорданың Достық үйінде Алғыс айту күніне арналған дөңгелек үстел өтті