Өңірде жиһаздың сан түрін шығаратын 34 кәсіпорын жұмыс істейді. Өнім сапасы шетелдікінен асып түспесе, кем емес. Дегенмен, мектептер мен балабақшалар және облыстағы өзге әлеуметтік нысандар жергілікті жиһазды тұтына бермейді. Бұл, әлбетте, аймақтық мазмұнның төмендеуіне себеп. Ендігі міндет: олқылықтың орнын толтырып, ШҚО тауар өндірушілерін қолдау.
– Әркез мектептерді аралағанда олардың бізде шығатын жиһазды емес, өзгенікін қолданатыны таңғалдырады. Биыл 7 мектеп салынып жатыр. Оған құйылған қаражат та көлемді. Сондықтан аймақтағы мектептер өзімізде шығатын жиһазды алуы керек. Сапалы, көп қызметті мектепке арналған жиһаз жасай бастаған соң, денсаулық сақтау саласының нысандарын қамти бастаймыз, – деді облыс әкімі Даниал Ахметов.
Бір ғана Өскеменде 404 профильді кабинет облыс әкімінің тапсырмасы бойынша халықаралық стандартқа сай жергілікті кәсіпкерлер шығаратын жиһазбен жабдықталады. Десе де, басты мәселе – тауар сапасы. Осы мақсатта алдымен өңірде бірыңғай стандарт жасалуы тиіс. Сондай-ақ, бұдан былай ШҚО тауар өндірушілері арнайы несие шарты бойынша , яғни, 8 жылға 8,5 пайыздық үстемемен қаржылай көмекке ие болады. Ол үшін «Даму» қорымен өзара келісімге мөр басылды.
