Бұған дейін Анкара үстінде әскери ұшақтар мен тікұшақтар пайда болып, атыс дыбыстары естілгені хабарланған еді.
Түркияның Бас штабы президенттің биліктен тайдырылып, елді басқаруды қолға алғандарын мәлімдеді. Әскерилер билік қалпында қалып, барлық халықаралық байланыстар сақталатындығына сендірді, деп хабарлайды Telegraph.
Анкара және Ыстамбұл прокурорлары төңкеріс жасауға қатысы бар әскерилерге қатысты тергеуді бастады, бұл туралы елдің әділет министрі Бекир Боздаг мәлімдеді.
Сонымен бірге Түркия президенті Режеп Тайып Ердоған қауіпсіз жерде, кейін мәлімдеме жасайды, деп хабарлады Reuters агенттігі.
Telegraph-тың хабарлауынша, Босфор бұғазының үстінен өтетін екі көпірді түрік полициясының қауіпсіздікке жауап беретін бөлімі - жандармерия жауып тастады, Ататүрік атындағы әуежай да жабылды, онда танкілер жіберілді.
Түркияның мемлекеттік телеарнасы төңкеріс кезінде хабар таратуын тоқтатты, әлеуметтік желілер шектелді. Алайда бірқатар видеолар мен суреттер әлемге таралып кетті.
Ыстамбұл қаласындағы ҚР Бас консулдығының кезекші коменданты ҚазАқпаратқа телефон арқылы, консулдықтың барлық жауапты қызметкерлері жағдайды жіті бағалау үшін қалада жүргендігін хабарлады. Түркиядағы жағдай және ондағы еліміздің азаматтары жөнінде білу үшін ҚазАқпарат Анкарадағы Қазақстан Елшілігіне хабарласуға әрекет етті, алайда қоңырау шалу мүмкін болмады.
https://www.youtube.com/watch?v=Xyhemz3Az4c
Қазақпарат
