Ұлы жеңістің 70 жылдығы қарсаңында,Алматы қаласындағы Республикалық ҰОС ардагерлері мен мүгедектерінің клиникалық госпиталінде соғыс ардагерлеріне арналған «Ашық есік» күндері өтті.
Бұл шараға Қазақ медициналық үздіксіз білім беру университетінің профессорлық-оқытушылар құрамынан жасақталған алдыңғы қатарлы мамандары жұмылдырылды. Барлық білікті кәсіби маманды бір жерге тоғыстырып, осындай жанашырлық, қамқорлық көрсетіп жатқан кезде мүмкіндікті пайдаланғысы келген қарт майдангерлер таңның атысымен-ақ диагностикалық тексеруге келді. Айналдырған бір сағаттың ішінде барлық тексеруден өтіп, дәрігер кеңесін алған қариялардың қуанышында шек болмады. «Ашық есік» күні аясында, әр ардагер жүрегін ЭКГ-ге түсіріп, рентген, бас-миының ультра дыбыстық зерттеуінен өтті.
Акция соңында ардагерлер осындай жағдай жасаған Қазақ медициналық үздіксіз білім беру университетінің ректоры Ғалымжан Асылбекұлы Тоғызбаев пен осы университеттіңпрофессорлық-оқытушылар құрамына зор ризашылықтарын білдірді.
