Qazaqstanda jańa oıyn aımaqtaryn qurý kózdelýde. Olar Mańǵystaý, Almaty, Shyǵys Qazaqstan oblystarynda jáne Jetisý oblysynda paıda bolýy múmkin. Bul týraly týrızm jáne sport mınıstri Erbol Myrzabosynov málimdedi, dep habarlaıdy Dalanews.kz.
Qoldanystaǵy Býrabaı men Qapshaǵaı oıyn aımaqtarynan bólek, jańa kazıno ornalastyrý myna aýmaqtarda josparlanǵan:
- Mańǵystaý oblysynda Kaspıı teńizi jaǵalaýynda;
- Jetisý oblysy Panfılov aýdanyndaǵy Alakól kóliniń mańynda;
- Almaty oblysynyń Talǵar aýdanynda;
- Shyǵys Qazaqstan oblysynyń Marqakól óńiri men Zaısan aýdanynda.
Alaıda atalǵan aýmaqtardyń naqty núkteleri ázirge anyqtalǵan joq.
Mınıstrdiń aıtýynsha, naqty jer telimderin tańdaý jergilikti atqarýshy organdardyń quzyretinde.
"Biz aımaqtardy ǵana belgileımiz, al naqty ýchaske ınfraqurylym men ózge de faktorlarǵa qaraı ákimdikter tarapynan anyqtalady", - dedi ol.
Erbol Myrzabosynov oıyn aımaqtaryn damytý tek týrızmdi ilgeriletý quraly retinde qarastyrylyp otyrǵanyn atap ótti. Onyń sózinshe, mundaı tájirıbe álemniń kóptegen elinde bar.
Mınıstrdiń málimetinshe, árbir jańa kazıno jyl saıyn búdjetke 2–3 mlrd teńge kóleminde salyq túsirip, shamamen 500 jumys ornyn ashady.
Sondaı-aq ol oıyn bıznesine salyqtyq júkteme azaıtylady degen aqparatty joqqa shyǵardy.
"Salyqty tómendetý týraly áńgime joq. Kazıno ár oıyn ústeli úshin salyq tóleıdi. Jalpy túsim 2–3 mlrd teńge bolady", - dedi mınıstr.
Úkimet ókilderi aldaǵy ýaqytta oıyn aımaqtarynyń sany artýy múmkin ekenin de joqqa shyǵarmaıdy.
"Qazir osy aımaqtar belgilendi, keıin týrızmdi damytý maqsatynda keńeıtilýi de yqtımal", - dep túıindedi Erbol Myrzabosynov.
