Nazarbaev Zıatkerlik mektepterinde beriletin prezıdenttik granttyń mólsheri azaıdy. Bul týraly tıisti buıryqqa QR Oqý-aǵartý mınıstri Ǵanı Beısembaev qol qoıdy, dep habarlaıdy Dalanews.kz.
Prezıdenttiń «Órken» bilim berý granty 2009 jyly alǵashqy zıatkerlik mekteptermen qatar engizilgen bolatyn. Bul grant oqý aqysyn tolyqtaı óteıdi. Oqýshylar tegin bilim alyp, jataqhanada turyp, tamaqtana alady.
Jańa buıryqqa deıin grant kólemi mynadaı bolǵan:
– 2 349 191 teńge (jataqhanasyz);
– 3 247 305 teńge (jataqhanamen).
Endi bul soma tómendetildi:
– 2 190 080 teńge (jataqhanasyz);
– 3 053 940 teńge (jataqhanamen).
2023 jyly qabyldanǵan buıryqqa sáıkes, grant kólemi jyl saıyn ındeksasıalaýǵa jatady.
NISH málimetinshe, bıylǵy oqý jylynda el boıynsha barlyq zıatkerlik mektepterde 17 884 oqýshy bilim alýda. Onyń ishinde 11%-y aýyl, shaǵyn qala men aýdan ortalyqtarynan kelgen balalar. Sondaı-aq, oqýshylardyń shamamen 39%-y áleýmettik osal toptardan.
2025 jyldyń qańtarynda «Kýrsıv» basylymy aýdıt qorytyndysynan keıin NISH-ta birqatar prosester ózgergenin habarlaǵan. Atap aıtqanda, aqyly negizde oqýǵa qabyldaý erejeleri ózgergen.
