Jetisý oblysy Saryózek aýylynda 19 jastaǵy áskerı qyzmetshige oq tıip, aýrýhanaǵa tústi. Atalǵan fakt boıynsha qylmystyq is qozǵaldy. Bul týraly QR Qurlyq áskerleriniń baspasóz qyzmeti málimdedi, dep habarlaıdy Dalanews.kz.
Oq tıip, jaraqat alǵan kishi serjant Temirbek Myńjasarov Saryózek garnızonyndaǵy áskerı bólimde qyzmet etken. Aqparattarǵa súıensek, ol 6 aı otan aldyndaǵy boryshyn ótep, bir jyl buryn kelisimshartpen áskerı qyzmetke qabyldanǵan. Otarǵa oqý-jattyǵýǵa attanbaq bolǵan ol qazirgi tańda resmı eńbek demalysyna shyǵyp, Eskeldi aýdanyndaǵy aýrýhanada em alyp jatyr.
"Almaty" arnasyna suqbat bergen Myńjasarovtyń ákesi Baqytbek Qasymov ulynyń jaralanǵanyn kezdeısoq bilgen.
Ony áskerı polısıa arqyly taýyp, aýrýhanaǵa aparǵan. Ákesiniń sózinshe, oq balasynyń bilegin tesip ótken. Sondaı-aq ol áskerı bólim basshylyǵy balany jaraqat alǵannan keıin aýrýhanaǵa aparmaı, bir táýlik boıy páterde tyǵyp ustaǵanyn jetkizgen.
Oqıǵaǵa baılanysty Qazaqstan Respýblıkasynyń Qurlyq áskerleriniń baspasóz qyzmeti túsinikteme berdi.
“2024 jylǵy 2 qyrkúıekte Saryózek garnızonyndaǵy 12740 áskerı bóliminiń kelisimshart boıynsha áskerı qyzmetshisi qarý-jaraqty qoldaný erejelerin buzýdyń saldarynan oń qolynan jaraqat aldy. Áskerı qyzmetshi Taldyqorǵan qalasyndaǵy oblystyq aýrýhanaǵa jatqyzylyp, oǵan barlyq qajetti medısınalyq kómek kórsetildi.
Zardap shegýshiniń densaýlyq jaǵdaıy qanaǵattanarlyq. Atalǵan fakti boıynsha qylmystyq is qozǵaldy. Tergeý múddesi úshin ózge de aqparat jarıalaýǵa jatpaıdy”, - delingen túsiniktemede.
