AQSH Memlekettik hatshysy Marko Rýbıo men Qazaqstan Premer-Mınıstriniń orynbasary – Syrtqy ister mınıstri Murat Nurtileý Vashıngtonda kezdesý ótkizdi, dep habarlaıdy Dalanews.kz.

Kelissózder barysynda AQSH tarapy Qazaqstannyń táýelsizdigi, egemendigi jáne aýmaqtyq tutastyǵyna degen turaqty qoldaýyn taǵy bir márte qýattady.

Marko Rýbıo men Murat Nurtileý ekijaqty saýda-sattyq pen ınvestısıalyq yntymaqtastyqty tereńdetý joldaryn talqylap, amerıkalyq kompanıalar úshin senimdi ınfraqurylym men qolaıly retteýshi ortanyń mańyzyn erekshe atap ótti.

“AQSH Qazaqstanmen qaýipsizdik salasyndaǵy áriptestikti keńeıtýdi, C5+1 formatyndaǵy dıplomatıalyq yntymaqtastyqty damytýdy, sondaı-aq tehnologıa men strategıalyq mańyzdy paıdaly qazbalar boıynsha ózara tıimdi komersıalyq múmkindikterdi qarastyrýdy jalǵastyrýǵa nıetti”, — delingen Memlekettik departamenttiń baspasóz hatshysy Temmı Brús taratqan málimette.

Eske salaıyq, buǵan deıin 12 naýryzda Premer-mınıstriniń orynbasary – Syrtqy ister mınıstri Murat Nurtileý AQSH-tyń Memlekettik hatshysy Marko Rýbıomen telefon arqyly sóılesken edi.

Syrtqy ister mınıstrligi baspasóz qyzmetiniń habarlaýynsha, taraptar saıası dıalog jáne ekonomıkalyq baılanystardy kúsheıtý jóninde pikir almasqan. Sonymen qatar strategıalyq seriktestik jaıynda sóz qozǵalǵan. Onyń qazirgi ýaqyttaǵy jaı-kúıi, damý bolashaǵy talqylanǵan.

Árıne, qazirgi kúrdeli geosaıası ahýaldyń nazardan tys qalmaıtyny túsinikti jaıt.

"Jahandyq qaýipsizdik jáne aımaqtyq turaqtylyqpen qatar, ózge de mańyzdy halyqaralyq jaǵdaılar jóninde pikir almasý boldy", – delingen SİM baspasóz qyzmetiniń habarlamasynda.

Eki eldiń laýazymdy tulǵalary turaqty baılanys ornatý týraly ýaǵdalasqan. Ondaǵy maqsat – eki jaqty yntymaqtastyq pen seriktestik qarqynyn joǵaltpaý.