Almaty oblysy ákiminiń birinshi orynbasary Qanat Esbolatov múgedek jandar týraly aıtqan sózin túsindirip berdi, dep habarlaıdy Dalanews.kz.
Esbolatov Densaýlyq saqtaý mınıstrimen Talǵarda ótken kezdesýge qalyń jurt jınalǵanyn, árqaısysy ózekti másele kóterip, suraq qoıýǵa asyqqanyn atap ótti. Sondyqtan kezek te úlken bolǵan.
"Reglament boıynsha kezdesýge eki saǵat bólingen edi. Biraq, suraqtardyń kóp bolýyna baılanysty jıyn shamamen 4 saǵatqa sozyldy. Kelgen azamattardyń arasynda birqatar múmkindigi shekteýli jan boldy. Keıbiri tik turyp, óz kezegin kútti. Kezegi jetkende zaldaǵy birneshe adam sózin bólip, oǵan kedergi jasaı bastady. Reglamentti saqtaýǵa shaqyrdym. Alaıda orys tilinde aıtqan sózimde qatelik bar. Oıymdy durys jetkizbeppin. “Qudaı úlken synaq bergen” dep aıtpaq bolǵanmyn.
Aıtqan sózim kópshiliktiń kóńiline, tipti namysyna tıgenin de túsindim. Osy úshin shyn nıetimmen keshirim suraımyn", - deıdi sheneýnik.
Qanat Esbolatov aýqymdy is-sharalarda aldymen egde jastaǵy turǵyndarǵa jáne múmkindigi shekteýli azamattarǵa jol berý mańyzdy ekenin aıtady.
"Qaı jıyn bolmasyn, olardy kóp kúttirmeı, kezeksiz tyńdaý – durys ári adamgershilikke saı dep esepteımin. Sizderdiń pikirlerińiz ben reaksıalaryńyz men úshin óte mańyzdy. Jıynda kóterilgen ár suraqty ákimdik pen mınıstrlik nazarǵa aldy, kópshiligine sol jerde jaýap berildi. Qosymsha pysyqtaýdy qajet etetin máseleler hattamaǵa engizilip, baqylaýǵa alyndy. Mınıstrlikpen birge bul baǵyttaǵy jumysty jalǵastyramyz.Belsendilik tanytqandaryńyz úshin barshańyzǵa taǵy da alǵys aıtamyn", - deıdi ákimniń birinshi orynbasary.
Aıta keteıik, áńgime Almaty oblysynda densaýlyq saqtaý mınıstri Aqmaral Álnazarovanyń halyqpen kezdesýinde bolǵan oqıǵa jaıly bolyp otyr. Oblys ákiminiń birinshi orynbasarynyń múmkindigi shekteýli jandar týraly aıtqan sózi jurttyń ashýyna tıgen edi.
Ol halyqty sabyrǵa shaqyryp, artynsha múmkindigi shekteýli jandar týraly aıtqan.
"Múgedekterdiń eńsesin túsirmeıik. Onsyz da Alla taǵala bul kisilerdi, oryssha aıtqanda, "ıh nakazalı". Syılaıyq. Sol úshin qudaı bastaryńyzǵa salmasyn. Qol-aıaqtaryńyz túgel, aýrý emessizder, osy kisilerdi qabyldasyn", - degen edi sheneýnik.
