Алматы облысы әкімінің бірінші орынбасары Қанат Есболатов мүгедек жандар туралы айтқан сөзін түсіндіріп берді, деп хабарлайды Dalanews.kz.
Есболатов Денсаулық сақтау министрімен Талғарда өткен кездесуге қалың жұрт жиналғанын, әрқайсысы өзекті мәселе көтеріп, сұрақ қоюға асыққанын атап өтті. Сондықтан кезек те үлкен болған.
"Регламент бойынша кездесуге екі сағат бөлінген еді. Бірақ, сұрақтардың көп болуына байланысты жиын шамамен 4 сағатқа созылды. Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым. Алайда орыс тілінде айтқан сөзімде қателік бар. Ойымды дұрыс жеткізбеппін. “Құдай үлкен сынақ берген” деп айтпақ болғанмын.
Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын", - дейді шенеунік.
Қанат Есболатов ауқымды іс-шараларда алдымен егде жастағы тұрғындарға және мүмкіндігі шектеулі азаматтарға жол беру маңызды екенін айтады.
"Қай жиын болмасын, оларды көп күттірмей, кезексіз тыңдау – дұрыс әрі адамгершілікке сай деп есептеймін. Сіздердің пікірлеріңіз бен реакцияларыңыз мен үшін өте маңызды. Жиында көтерілген әр сұрақты әкімдік пен министрлік назарға алды, көпшілігіне сол жерде жауап берілді. Қосымша пысықтауды қажет ететін мәселелер хаттамаға енгізіліп, бақылауға алынды. Министрлікпен бірге бұл бағыттағы жұмысты жалғастырамыз.Белсенділік танытқандарыңыз үшін баршаңызға тағы да алғыс айтамын", - дейді әкімнің бірінші орынбасары.
Айта кетейік, әңгіме Алматы облысында денсаулық сақтау министрі Ақмарал Әлназарованың халықпен кездесуінде болған оқиға жайлы болып отыр. Облыс әкімінің бірінші орынбасарының мүмкіндігі шектеулі жандар туралы айтқан сөзі жұрттың ашуына тиген еді.
Ол халықты сабырға шақырып, артынша мүмкіндігі шектеулі жандар туралы айтқан.
"Мүгедектердің еңсесін түсірмейік. Онсыз да Алла тағала бұл кісілерді, орысша айтқанда, "их наказали". Сыйлайық. Сол үшін құдай бастарыңызға салмасын. Қол-аяқтарыңыз түгел, ауру емессіздер, осы кісілерді қабылдасын", - деген еді шенеунік.
