Back

Оңтүстік жұрты шалғай аудандарға ұшақпен қатынауы мүмкін

Таяуда Оңтүстік тұрғындары шалғай аудандарға әуе жолы арқылы қатынауы мүмкін. Бұл туралы канадалық «Викинг Эйр» компаниясы ұсынған ұшақтарды таныстыру кезінде белгілі болды. Шараға ОҚО әкімінің орынбасары Сапарбек Тұяқбаев қатысты, деп хабарлайды kz.otyrar.kz.

Шымкентке келген компания өкілдерінің айтуынша, «Twin otter 400» ұшағына 19 адам сыяды. Бұл әуе кемесі тек жолаушыларды тасымалдап қана қоймай, жүк тасымалдай алады. Көп салалы ұшақтың су бетіне, тіпті, асфальт төселмеген қара жерге де қонуға мүмкіндігі бар.

Егер Қазақстан мен канадалық компания арасында келіссөздер жақсы нәтиже берсе, осы ұшақтардың алғашқы бағыты Шардара болмақ. Одан кейін Мақтаарал мен Созақ аудандарына жеткізілуі мүмкін.

«Викинг Эйр» компаниясы өкілінің айтуынша, олар Қазақстанмен жұмыс жасауға дайын. Сонымен бірге Қазақстанның экономикалық әлеуеті азаматтық авиация тұрғысында өте жоғары деп есептейді.

Айта өтейік, әр ұшақтың бағасы 7 млн АҚШ долларын құрайды.

 

Дереккөзі: bnews.kz