Cоңғы жаңалықтар
Back

Жалақыны көтеру? Италиядан келетін үлкен басшыны күтіп отырмыз – БҚО әкімі

Батыс Қазақстан облысы әкімі Нариман Төреғалиев Ақсай қаласындағы KKS-Sicim компаниясы жұмысшылары жалақыны 50 пайыз өсіру туралы талабымен келіспейді.

Бұл туралы әкім сейсенбі, 17 қаңтарда үкімет отырысына қатысқаннан кейін журналистер сұрағына берген жауабында айтты.

– Талаптары орынсыз деп ойлаймын. Себебі олардың ұжымдық келісімшарты бар, оның сыртында әрбір жұмысшы мен жұмыс беруші арасында жасалған жеке келісімшарт бар. Сондықтан сол келісімшарттарда қаралған екіжақты міндеттемелерде жалақыны 50 пайыз немесе 100 пайыз көтеру деген жоқ. Келісімшартта 20 пайыз деген ғана бар. Сондықтан да (талаптары) орынсыз, – деді Нариман Төреғалиев.

БҚО әкімінің сөзінше, мекемеде орташа жалақы 280 мың теңге, “ең жоғарғы жалақы 800 мыңға дейін барады”.

– (Жұмысшылар жалақыны 20 пайыз көтеруге) келіспесе, әрі қарай келісім жүргіземіз. Ертең кешке ең үлкен басшысы Италиядан келеді, шақырып жатырмыз. Сол келген соң тағы сөйлесеміз, – деді Төреғалиев.

Бұған қоса әкім заңға сілтеп, жұмысшылар жұмысқа шығуы тиіс, егер шықпайтын болса шара қабылданады деп ескертті. Сөзінше, үш мыңдай жұмысшысы бар KKS-Sicim компаниясының бес жүзге жуық жұмысшысы ереуілдеп, жұмысқа шықпаған.

16 қаңтарда Батыс Қазақстан облысы Бөрлі ауданы Ақсай қаласындағы Қарашығанақ кен орнында KKS-Sicim жауапкершілігі шектеулі серіктестігінің бірнеше жүз жұмысшысы таңертеңгі сағат алтыда ереуіл бастаған. Жалақыны елу пайыз көбейтуді талап еткен олар жұмысқа шығудан бас тартқан.

Бұған дейін Dalainside телеграм арнасы “Италия инвесторларының қазақтарды қалай алдап келгенін” жазған. Мұны мына жерден оқи аласыз: https://t.me/dalainside/1078

Тағы оқыңыз:

Мәдениет министрлігі медаль тарататын мекемеге айналып кетті