Cоңғы жаңалықтар
Back

Жамбылдағы жарылыс. Күдікті ретінде ұсталған генерал-майор қамаудан босатылды

«Оңтүстік» өңірлік қолбасшылығының бұрынғы басшысы, генерал-майор Қайдар Қарақұлов Жамбыл облысы Байзақ ауданына қарасты Сарыкемер қыстағындағы жарылыстарға қатысты қылмыстық іс бойынша күдікті деп танылды, – деп хабарлайды Dalanews.kz ІІМ-ге сілтеме жасап.

21 сәуірде Қарақұлов тергеу изоляторынан босап шыққаны мәлім болды. Оның қамауға алынғаны содан бір күн бұрын ғана хабарланған.

Ішкі істер министрлігінің тергеу департаменті әскери тергеу басқармасының хабарлауынша, Қарақұловты «бас прокурордың көмекшісі күдіктіні қамауда ұстау қажет емес деп танығанына байланысты» босатылған. Басқарма мәліметінше, іске қатысты тергеу жүріп жатыр.

Наурыз айында Қайдар Қарақұлов «Оңстүстік» өңірлік қосбасшылығының басшысы қызметінен босатылған.

2021 жылғы 26 тамызда Жамбыл облысының Байзақ ауданында қару-жарақ қоймасы жарылды. 17 адам қаза тапты. Бір адам із-түссіз жоғалды. Жүзге жуық адам жараланып, жүздеген адам басқа жерге көшірілген-ді. Қаза тапқандар арасында төтенше жағдай қызметінің, прокуратураның қызметкерлері мен әскерилер болды.

Былтырғы 10 қазанда Жамбыл облысы Сарыкемер қыстағындағы инженерлік қару-жарақ қоймасында тағы бір жарылыс болды. Қорғаныс министрлігі төтенше оқиға кезінде ешкім зардап шекпегенін хабарлады.

2019 жылғы маусымда Түркістан облысындағы Арыс қаласында әскери қойма жарылып, төрт адам қаза тауып, 60 мыңнан астам адам үйлерін тастап кетуге мәжбүр болды. Ресми мәлімет бойынша, Арыстағы жарылыстан 7 527 тұрғын үй және 103 көп қабатты үй қирады. Шамамен 500 үй мен үш көп қабатты үй сүрілді.

Тағы оқыңыз:

Саясат Нұрбек: «Президентке халықтың үнін ешқандай фильтрсіз жеткізу маңызды»

«AMANAT» фракциясының депутаттары өңірлерде 1200-ден астам кездесу өткізген