Back

Қазақстанда “жасыл” облигация түсінігі айналымға енеді 

Қаржы нарығын реттеу мен дамыту агенттігі нарыққа “жасыл облигация” терминін енгізу мәселесін талқылауда деп хабарлайды Dalanews.kz. 

Агенттікке қарасты Бағалы қағаздар нарығы басқармасының басшысы міндетін атқарушы Гүлшахра Талқамбаева осынау бастаманың “жасыл экономика” бағытымен тікелей байланысты екенін айтты. 

“Жасыл экономика тек қоршаған ортаны қорғауға бағытталған шаралармен шектелмеуі керек. Бұл бағытта Үкімет “жасыл қаржыландыру” жобасын іске асыруды көздеп отыр. 

Бұл да бүгінгі күннің негізгі тенденциясының бірі. “Жасыл” облигациялар инвестиция тартуға жол ашады”, – дейді департамент директоры.

Оның атап өткеніндей, “жасыл” облигациялар деп – борыштық бағалы қағазды айтады.

Соның көмегімен “жасыл” облигацияларды шығаратын компания елдегі экологиялық мәселелерді шешуге бағытталған жобаларды жүзеге асыру үшін капитал тартады. 

Жасыл жобаларды “жасыл” бағалы қағаздардың көмегімен қаржыландырудың алгоритмін Экология министрлігі әзірлеу үстінде. “Жасыл” облигацияны еліміздегі кез-келген коммерциялық компания шығара алады, сайып келгенде оның басқа бағалы қағаздардан айырмашылығы жоқ. 

“Жасыл” бағалы қағазды орналастыру арқылы алынған қаражат экологияға теріс әсер ететін факторларды азайтуға, қуатты үнемдеуге, климаттың өзгеруін тежеуге және жаңа жағдайға бейімделген жобаларды қаржыландыруға жұмсалады. “Жасыл” облигация негізінде қаржы тартқан компаниялар жобаның тиімділігі туралы жыл сайын есеп беруі қажет”, – дейді осы орайда Гүлшахра Талқамбаева.

Сарапшы қазақстандық аудиторияның бағалы қағаздар нарығын жете меңгермегенін атап өтіп, осынау жүйенің жұмысына тоқталған екен. 

“Әлемдік тәжірибе бойынша, негізгі сыйақыны алудан бөлек, облига­циясы бар азаматтың қандай жағдай болмасын қо­сымша сыйақы алатын құқысы бар. 

Инвестициялық облигация­ның кірісі ба­залық актив бағасының серпініне бай­ланысты”, – дейді ол. 

Оның айтуынша облигация нарығы тұрақтылықты ұнатады. Мұндай нарық инвесторлар үшін аса тартымды. Облигациядан түсетін кірістің белгілі бір индикаторға қосылуы инвесторлар үшін бағалы қағазға қатысты ұзақ мерзімді болжам жасауына мүмкіндік береді. 

Әзір әлемнің дамыған елдері облигация бойынша сыйақы төлеу жүйесін ыңғайлы етуге және қатысушының тәуекелдерін төмендетуге күш салуда. Ал төлемдер баға­лы қағаздардың пайыз­дық мөлшерлемелеріне, одан бөлек қор және тауар индекс­іне байланысты.

Қаржы нарығын реттеу және дамыту агенттігі “жасыл” бағалы қағаздарды шығару, оларды айналымға енгізуге қатысты талап-шарттарды пысықтап, тиісті түзетулер әзірлеуде.

“Жасыл” облигациялар жыл аяғына дейін қолданысқа енеді деп күтілуде.

Гүлшахра Талқамбаеваның пікірінше Қазақстанның “жасыл” облигациялар терминін нарыққа енгізіп, осы арқылы “жасыл” экономикаға бет бұруы елімізге деген инвес­торлардың  қызығушылығын оятады.