Қыздар университеті XIX ғасырда шыққан кітаптардың цифрлы көшірмесі жасады

Dalanews 01 мау. 2021 11:12 232

Қыздар университетінің электронды кітапханасы 20 ғылым саласы бойынша оқу құралдары мен XIX ғасырда жарық көрген 300-ге жуық құнды әдеби жәдігерлердің цифрлы көшірмесін жасады, – деп хабарлайды Dalanews.kz Оқу орынның баспасөз қызметіне сілтеме жасап.

Сондай-ақ «Рухани жаңғыру» бағдарламасы аясында шыққан «Жаңа гуманитарлық білім. Қазақ тіліндегі 100 жаңа оқулық» жобасы бойынша қазақ тіліне аударылған кітаптардың электронды нұсқасы да жүктелді.

Кітапхана оқырмандарының кез келген әдебиетті компьютерге немесе мобильді телефонға жүктеп алу мүмкіндігі қарастырылған.

Айта кетейік, оқу орнының электронды кітапхана қорында 10 мыңнан астам әдебиет сақтаулы. Оның ішінде лицензияландырылған таспалар, оқулықтар мен сирек басылымдардың электронды және цифрландырылған нұсқалары бар.

Жалпы алғанда, Қазақ ұлттық қыздар педагогикалық университетінің Ғылыми кітапханасындағы әдебиеттер қоры 1 миллионнан асады. Басылымдардың 700 мыңға жуығы оқу құралдары болса, 192 мыңнан астамы ғылыми бағыттағы кітаптар. Ал көркем әдебиеттің үлесі 142 мың шамасында. Университеттің кітап қорында 54 мың шамасында сөздіктер, анықтамалықтар мен энциклопедиялар сақтаулы. Жалпы, әдебиеттердің 936 512-сі қазақ тілінде, 120 939-ы орыс тілінде және 10 327-і шетел тілдерінде.

Ұсынылған
Соңғы жаңалықтар
x