Cоңғы жаңалықтар
Back

Ақсу ауданында тауарлы сүт фермаларын көбейту ісі қолға алынды

Жетісу облысына қарасты, Ақсу ауданындағы ірімшік шығаратын зауытты қажетті шикізатпен қамтамасыз ету үшін ауданда тауарлы сүт фермалары салына бастады. Айталық, Қызылағаш ауылында «Агрохолдинг Ақсу» ЖШС шамамен 5 млрд теңге инвестиция құйып, осы жобаларды қолға алуда, – деп хабарлайды Dalanews.kz Жетісу облысы әкімінің баспасөз қызметіне сілтеме жасап.

Өңірде өткен жылдан бері 1300 басқа арналған тауарлы сүт фермасын салуға дайындық жұмыстары басталып, Даниядан 600-ден астам бас ірі қара әкелген-ді. Алда тағы екінші ферманың құрылысын бастау жоспарда бар.

Жетісу облысы әкімі Бейбіт Исабаев Ақсу ауданына барған сапарында осындай бастамалардың, су шаруашылығы, құрылыс салаларындағы басқа да нысандардың жайымен танысты.

Бейбіт Исабаев Қызылағаш ауылындағы «Агрохолдинг Ақсу» ЖШС-ның сүт фермасы мен ірімшік шығаратын зауыт салу, тұрғындар үшін 80 үй салу бастамаларын қолдайтынын айтты. Тұрғын үйге қажетті инженерлік-инфрақұрылым тартылуына көмек көрсетуді аудан әкімдігіне тапсырды. Ең бастысы жергілікті азаматтарды жұмыспен қамтуға көп көңіл бөлу керектігін еске салды.

Ақсу өңіріндегі тағы бір жақсы жоба – «Ақсу ГЭС» ЖШС-ның форель шаруашылығы. Серіктестіктің балық шаруашылығымен айналысуды былтыр бастаған.

Жоба бойынша мұнда 170 тонна тауарлы балық өндірілетін болады. Кәсіпкер іске 515 млн теңге жеке қаражатын салған. Қазіргі кезде инкубациялық цехтың құрылысы біткен, оған екі инкубациялық аппарат сатып алыныпты. Электр желісі тарылған. Кәсіпорын тоңазытқыш құрылғыларын Панфилов ауданында орнатқан, тауар сол жерден алғашқы өңдеуден өткізіліп, экспортқа жөнелтілетін болады.

Ұзақ жыл тоқтап тұрған тұрған Ақсу қант зауыты іске қосылғаннан кейін оның жобалық қуаты 450 мың тонна қант қызылшасын өңдеуге жеткен. Жүктемені қамтуға шикізат жетіспеушілігі туындағандықтан зауыт қамыс қантын өңдейтін желісін іске қосу жұмыстарына кіріскен.

Бұл ретте Бейбіт Исабаев, қант қызылшасының алқабы бірте-бірте ұлғайтылатынын айтты:

– Ең алдымен суармалы судың мәселесін шешуіміз керек. Қазір суару каналдарын қайта жаңғыртып, қалпына келтіру керек. Қант қызылшасын да, қант қамысын да қатар өңдейміз. Көксу қант зауыты соның арқасында жыл бойы үздіксіз жұмыс істеп тұр. Осындай жүйеге Ақсу зауыты да көшуі керек. Өз кезегінде зауыт іргелі кәсіпорын ретінде қант қызылшасының сапасын көтеру ісіне белсене атсалысуы тиіс. Мемлекет қажетті көмек жасап отыр. Соған лайық сіздер тарапынан да бастамалар болуы керек, қызылша өсіруші шаруашылықтармен бірігіп жұмыс істеп, оларға жәрдем жасап отырсаңыздар, екі тарапқа да тиімді болары сөзсіз. Қазір алқаптардағы жұмыстың басым бөлігі қол күшімен атқарылады, ол – ауыр еңбек, сондықтан оны механикаландыруға назар аудару керек, – деді облыс әкімі.

Аудандағы суармалы су жетіспеушілігін шешуге Қызылағаш су қоймасының қалпына келтірілгені үлкен әсерін тигізбек.

Су қоймасының толық сыйымдылығы – 42 млн м3. Мұнда қазір нысанның қауіпсіздігі мен шыдамдылығын тексеру процестері жүріп жатыр. Плотина 7 мыңға жуық гектар жерді суармалы сумен қамтуға кезең-кезеңімен кірісетін болады.

Ауданда ирригациялық жүйелердің құрылысы мен қайта жаңғырту жұмыстары қатар жүруде. Бұл 12 мыңға жуық гектар суармалы жерді айналымға қосуға мүмкіндік береді. Қазіргі кезде 15 шақырым желі тартылған, тағы 60 шақырымға жүргізіледі.

Жалпы Ақсу, Сарқан, Алакөл аудандарындағы ирригациялық желілер мен су қоймаларын қалпына келтірудің арқасында айналымға 25 мың гектардан астам суармалы жер қосылады деп күтілуде.

Сапар барысында Бейбіт Исабаев бірқатар әлеуметтік нысандардың құрылыс жұмыстарының барысын қарады. Сағабүйен ауылындағы Тоқтаров атындағы орта мектептің күрделі жөндеуі кестеге сәйкес қазанның соңына дейін аяқталуы тиіс. Оқушылар екінші тоқсанды туған ауылының жаңарған мектебінде оқитын болады. Сағакүрес ауылында шағын орталығы бар 120 орынды жаңа мектеп салынып жатыр.

Тағы оқыңыз:

Қонаев қаласында асық ойнайтын алаңша пайда болды