Back

Қала күні Алматыда үздік аббаттандырылған аула анықталды

Алматыда Қала күні мерекесінде аулаларды үздік көгалдандыру байқауының қорытындысы шығарылды. Қазылар алқасы үздік үш жеңімпазды және Гран-при иегерін анықтады, – деп хабарлайды Dalanews.kz.

Алматы қаласының әкімі Бақытжан Сағынтаев жеңімпаздарды құттықтап, байқаудың негізгі мақсаты – аулаларды көгалдандыруда жаңа шешімдер табу, қала тұрғындарының белсенділігі мен шығармашылығын ынталандыру екенін еске салды.

Аула аумағын ең жақсы абаттандыруға арналған байқау тұрғындарды тұрғын аудандарда жасыл аумақтар құруға қатысуға ынталандырды. Сонымен қатар, мұндай байқаулар жас ұрпақтың экологиялық тәрбиесіне оң әсер етеді.

Байқауға қатысқысы келетіндер өте көп болды – қазылар алқасына 324 аула ұсынылды, олардың 85-і таңдап алынды.

Көгалдандыру идеялары әдемі әрі ерекше болып шықты, сондықтан жеңімпаздарды таңдау оңай болған жоқ. Гран-при жеңімпазын анықтау үшін Қоғамдық кеңес мүшелерінен, ландшафтық сәулетшілерден, қоғамдық ұйымдардың басшыларынан қазылар алқасы құрылды. Ал 1-3 орындар үшін жеңімпаздар электронды дауыс беру арқылы анықталды.

Еске салсақ, байқау тамыз айының соңында жарияланды, ал өтінімдерді қабылдау 3 қыркүйекте басталды. Материалдық қорды, ауланы көгалдандыруға қажет заттарды, өсімдіктерді сатып алу үшін бөлінетін бас жүлде 5 миллион теңгені Түрксіб ауданындағы Монтажная көшесі, 15 мекенжайындағы ауланың тұрғындары алды.

«Аула аумағын көгалдандыру – 2021» байқауында жеңімпаз атанған тұрғын Яна Чистилина өз әсерімен бөлісті.

– Біз ауланы жеңіс үшін көгалдандырған жоқпыз, бұл бұрыннан келе жатқан дәстүр. Біздің тұрғындар өте тату, олар өздері тұратын қаласын жақсы көреді. Алматы куніндегі бұл жүлде біз үшін үлкен сыйлық. Мен Алматы тұрғындарына аулаларды күтіп-баптауға, оларға қамқорлық жасауға, бастамашылықты танытуға шақырамын, – деді Я. Чистилина.

Қазылар алқасының мүшесі, ландшафт сәулетшісі Гүлзада Қалдыбаева алматылықтардың аулаларын жақсартуға деген жоғары ұмтылысын атап өтті.

– Біздің тұрғындар өздерін үлгі ретінде көрсетіп өз қолыңызбен жасау арқылы жайлы жағдайда өмір сүре алатыныңызды көрсетеді. Әріптестерімізбен бірге біз көшеттердің санын ғана емес, сонымен қатар арамшөптерден арылуды да бағаладық, суаруға, көгалдардың жағдайына, кіші архитектуралық пішіндердің болуына назар аудардық, – деді Г. Қалдыбаева.

Алматыда 4 183 аула бар. Өткен жылдары 3 мыңға жуық аула жөнделді. Шамамен 550 аула жаңа көппәтерлі тұрғын үйлердің аумағына немесе апатты үйлерге жатады, сондықтан оларды жөндеу мүмкін емес. Ағымдағы жылы «Бюджетке қатысу» жобасы аясында 536 ауланы жаңарту жоспарлануда.

Айта кетерлігі, бүгін, 19 қыркүйекте Қала күні аталып өтуде. Биылғы жылы эпидемиологиялық жағдайға байланысты бұқаралық іс-шаралар тоқтатылды, қалғандары негізінен онлайн форматында немесе қатысушылардың ең аз санымен өткізіледі.

Тағы оқыңыз:

Сағынтаев алматылықтарды Қала күнімен құттықтады