Түркістандықтар Маңғыстауға 100 вагон жем-шөп жөнелтті

Dalanews 05 там. 2021 10:01 142

Түркістан облысы әкімдігі, «Қазақстан темір жолы» ҰК» АҚ-ның қолдауымен 95 вагон (3 мың тоннаға жуық) шөп Маңғыстау облысына жөнелтті, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.

Арыс қаласынан – 17 вагон, Сарыағаш қаласының теміржол станциясыннан – 51 вагон, Шымкент қаласынан – 18 вагон, Бадам ауылдық округінен – 4 вагон, Отырар ауданынан – 5 вагон шөп тиелген.

Бүгінгі таңда Маңғыстау облысының шаруаларына Түркістан облысы әкімдігі ерікті жастардың, кәсіпкерлердің, жанашыр тұрғындардың ұйымдастыруымен мал азығы тапшылығы орын алған аумақтарға көмек қолын созуда.

Облыстық ауыл шаруашылығы басқармасының мәліметінше, биылғы қуаңшылық батыс өңірлерімен қатар, Түркістан облысының Келес, Сарыағаш аудандарының жыл сайын табиғи шөп оратын алқаптарына да әсер етіп, табиғи шөп бітік шықпады.

Алдағы қыс айларында мал азығының тапшылығын алдын алу мақсатында облыстағы орман қорының жерлерінен табиғи шөптерді орып алу ұйымдастырылуда, сонымен қатар Келес, Сарыағаш, Жетісай, Мақтарал аудандары Шардара, Отырар аудандарының жайылымдарын пайдалану туралы меморандум жасалынған.

Түркістан облысы әкімі Өмірзақ Шөкеевтің тапсырмасына сәйкес, облыстың агроқұрылымдарына орман қоры жерінен жайылымдық және шабындық жерлер ұсынылып, биылғы жылдың 6 айында 545 агроқұрылымға 563 мың гектар жайылым жер, шөп шабуға 23 агроқұрылымға 1,5 мың гектар шабындық жер берілді. Осы орайда, облыстың мал азығы жағдайында талдау жасап, жағдайдың тұрақтылығына көз жеткізілді.

Биыл өңірдегі мал басына қажетті 4 млн тоннаға жуық мал азығын 100% дайындауға толық мүмкіндіктер бар. Оның ішінде 2,7 млн тонна жоңышқа, 134,6 мың тонна сүрлем, 71 мың тонна пішендеме және 945 мың тн табиғи шөп жиналады. Бүгінгі күнге 3,2 млн тонна мал азығы жиналды (81 %). Аймақта мал шаруашылығы саласы тұрақты дамуда. Соңғы екі жылдың өзінде мал басы мен одан алынған өнім көлемі 10-15%-ға артқан.

Ұсынылған
Соңғы жаңалықтар
x