Back
| DalaNews

Түркістанға отандық вакцина жеткізілді

Жамбыл облысында жасалған «KazCOVID-in» вакцинасының алғашқы легі Түркістан облысына жеткізілді, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.

QazVac қазақстандық екпенің 2 мың дозасы Түркістан облысындағы вакцина салатын бекеттерге таратылды. Отандық вакцина «Биологиялық қауіпсіздік проблемалары» ғылыми зерттеу институтының базасында жасалған.

Елімізде қатерлі індетке қарсы екпе қабылдау шарасы 1 ақпаннан басталған болатын. Сол уақыттан бері облыста 45 мыңға жуық адам екпе қабылдауға ниет білдірді. Оның 17 мыңға жуығы медициналық қызметкер болса, 19 мыңға жуығы педагогтар мен полиция қызметкерлері.

Бұдан бөлек өзге топтағы азаматтар 4 мыңнан асады. 22 ақпаннан бастап облыста екінші компонентпен (ревакцинация) 14 мыңнан астам адам вакцина салдырды. Соңғы тәулікте Түркістан облысында 49 адамда COVID-19 індеті анықталды. Тәуліктік өсім 0,94 % құрайды. Түркістан облысы еліміз бойынша «жасыл аумақта» тұр.

Пандемия белең алағалы 657 442 ПТР- сынамалары алынған. Ал, соңғы тәулікте зертханаларда 3 мыңнан астам адам тексерілді. Аймақта бүгінде жалпы 23 мыңнан астам медицина қызметкері бар. Оның 5000-нан астамы дәрігерлер, қалғандары орта буын мамандары. Өңірде қауіпті індетті жұқтырған 4642 науқас толық жазылып шыққан. Жалпы, пандемия басталғалы Covid-19 инфекциясы расталған 5255 жағдай тіркелді. Олардың 3407-да ауру симптомсыз өткен болатын.

«Халық денсаулығы және денсаулық сақтау жүйесі туралы» кодекстің 77-бабына сәйкес, кез келген медициналық ем-шара, оның ішінде вакцина салу тек адамның келісімімен ғана жүзеге асады. Вакцинадан бас тартқандар әкімшілік не қылмыстық жауапкершілікке тартылмайды. Денсаулық сақтау министрлігінің мәліметінше, екпе егердің алдында сіз арнайы параққа қол қою арқылы вакцинадан бас тартып немесе салдыруға келісім бересіз.

Тағы оқыңыз:

Шөкеев ақсақалдардың базынасына құлақ түрді