Салтанатты шараның ашылу салтанатында алғы сөз алған аудан әкімінің орынбасары Е.Күзембаев:
– Елбасымыз Н.Ә. Назарбаев 2018 жылғы 5 қазандағы Жолдауында 2019 жылды – Жастар жылы деп жариялаған болатын. Тұңғыш Президентіміз жастардың бүгіні мен болашағына қамқорлық жасауды өз саясатының негізгі мәні деп санайды. Өйткені, жастар қоғамның бір бөлігі ретінде мемлекетте маңызды рөл атқарады, – деп әкім орынбасары бүгінгі өз жеке кәсібін ашуға үлкен қадам жасағалы тұрған аудан жастарына сәттілік тілеп, оқу сертификаттарын тапсырды.
Шара барысында жас кәсіпкерлердің өз қолымен дайындаған бұйымдары мен тағамдарының көрмесі ұйымдастырылып, аудандық мәдениет үйінің өнерпаздары тарапынан концерттік бағдарламаға ұласты.
Бүгінгі таңда ауданда 107 жас «Жас кәсіпкер» оқу курстарын аяқтап, өз жеке кәсібін ашуға мемлекет тарапынан берілетін 505 мың теңге қайтарымсыз грантқа қатысуға үміткер болып отыр.
Сондай-ақ, ауданда еліміздің болашағы жастар үшін сапалы білім алып, спортпен шұғылдануға барлық жағдайлар жасалынған.
Айталық, биылғы жылы Азаттық елді мекенінен 600 орындық жаңа мектеп білім күніне пайдалануға берілсе, Пушкин, Бреусов, Шевцов, Кошевой, Жамбыл, Сеславино, Алтынсарин мектептеріне күрделі жөндеу мен қосымша корпус құрылыстары жүруде. Бұдан басқа Састөбе кентінен 240 жас бір мезетте спорттың алуан түрімен шұғылдануға бағытталған спорт кешені ашылса, аудан орталығындағы спорт мектебі жаңынан жаңа күрес залы мен «Жанкент» мөлтек ауданынан су жаңа кіші футбол алаңы, «Стрит воркаут» және балаларға арналған ойын алаңшалары аудан жастарының игілігіне пайдалануға берілмек.
«Біз сендердің білікті маман, болашағы жарқын отаншыл азамат болып өсулерің үшін барлығын жасап келеміз» деген Елбасымыздың еліміздің жастарына айтқан нақыл сөзі, Түлкібас ауданында атқарылып жатқан жұмыстармен іспеттес.
Бақытжан ИМАНБАЕВ
