Back

«Қырғызға тәуелділіктен құтыламыз». Жаңа жоба шарауларға орасан зор мүмкіндік сыйлайды

Жамбыл облысында алдағы жылы үш су қоймасының құрылысы басталады. Жергілікті шаруаларға оразан зор мүмкіндік сыйлайтын жаңа гидроқұрылым 2024 жылға дейін пайдалануға беріледі. Құрылыс жұмыстарын жүргізу үшін ҚР Қаржы министрлігіне бюджеттік өтінім берілген, – деп хабарлайды Dalanews.kz «Қазсушар» РМК баспасөз қызметіне сілтеме жасап.

Бұл туралы «Қазсушар» РМК Жамбыл облыстық филиалының директоры Қазыбек Бедебаев  «Қазсушар» мекемесінің әлеуметтік желідегі  ресми парақшасында өткен тікелей эфирде айтты.

– Жамбыл облысында су тапшылығы талай жылдан бері күн тәртібінен түспей келеді. Егер  бұл мәселені түбегейлі шешу тек қаржыға ғана байланысты болса, су тапшылығынан әлдеқашан құтылар едік. Өкінішке орай, өңір трансшекаралық өзендердің суын пайдаланатын болғандықтан мұнда көршілес мемлекетке тәуелділік те бар.  Десе де, осы  мәселені шешу үшін үш су қоймасын салуды жоспарлап отырмыз. Техникалық-экономикалық негіздеме мемлекеттік сараптаманың оң қорытындысын алды. Енді салалық  министрлік қажетті  қаражатты бөлсе, құрылыс жұмыстарын бастаймыз, – дейді «Қазсушар» РМК Жамбыл облыстық филиалының директоры Қазыбек Бедебаев.

Айта кетейік,  қаржы мәселесі шешілсе Қордай ауданында сыйымдылығы 15,222 миллион текше метр  болатын «Ырғайты» су қоймасының іргетасы қаланбақ. Сондай-ақ, дәл осы ауданда сыйымдылығы 14,6 миллион текше метрді құрайтын «Қалғұты» су қоймасы, Байзақ ауданында  11,107 миллион текше метр су сиятын  «Ақмола» су қоймасы салынады.

– Бұл нысандардың  жалпы құны 14,9 миллиард теңгеге тең. Жаңа су қоймалары вегетация кезінде көрші мемлекетке ағын суға тәуелділікті азайтып, облыс аумағындағы  34,5 мың гектар суармалы алқапты  суландыруға мүмкіндік береді, – дейді Қазыбек Бедебаев.

Бүгінде өңірде ауыл шаруашылығы дақылдары егілген егістіктің жалпы көлемі 200 мын гектардан аса құрайды. Ал қайта жаңғырту жұмыстары аясында тозығы жеткен гидротехникалық  нысандар қайта қалпына келтіріледі.  Облыстағы Байзақ, Жамбыл, Жуалы, Қордай және Меркі аудандарындағы су шаруашылығы нысандарына «Еуропа қайта құру және даму банкі» есебінен қайта жаңғырту жұмыстары жүргізіліп жатыр. Бүгінгі таңда 31 жоба бойынша аталған  жұмыстардың мердігерлері анықталып, құрылыс жұмыстары қолға алынған .

– Жаңғырту жұмыстарының жалпы құны 21,5 миллиард теңгені құрайды. Жобаның жүзеге асуымен 1388 шақырым  болатын 310 нысан күрделі жөндеуден  өтеді. Биылғы жылдың 5 мамырына дейін  87 шақырымға жуық каналды бетонмен қаптау және 189 шақырымдай каналға механикалық тазалау жұмыстары жүргізілді, – деді спикер.

Қайта жаңғырту жұмыстары аяқталғаннан кейін  өңірде  51,271 мың гектар суармалы алқап қайта айналымға енетін болады.

Тағы оқыңыз: