Back

85 мың, 106 мың, 159 мың теңге. Қазақстанда жаңа жәрдемақы берілетін болды

8 балаға берілетін жәрдемақы мөлшері 85 мың, 10 балаға – 106 мың, 15 балаға – 159 мың теңгені құрайды.

2020 жылғы 1 қаңтардан бастап енгізілген көпбалалы отбасыларға арналған мемлекеттік жәрдемақыларды 8-ші және одан кейінгі балаға саралауды жоспарлап отыр. Бұл туралы ҚР Еңбек және халықты әлеуметтік қорғау министрлігінің 2019 жылғы жұмыс қорытындысы және 2020 жылға арналған негізгі міндеттер бойынша алқа отырысында ведомство басшысы Біржан Нұрымбетов мәлімдеді, деп хабарлайды Dalanews.kz.

Біржан Нұрымбетов өз сөзінде министрліктің негізгі міндеттерінің бірі табысы аз азаматтарға атаулы әлеуметтік көмек (бұдан әрі – АӘК) көрсету болып табылатындығын атап өтті. Сонымен, 2019 жылдың қорытындылары бойынша 486 мың отбасына немесе 2,4 миллионға жуық адамға АӘК тағайындалды. Жалпы алғанда, АӘК 244,2 млрд теңге сомасында төленді.

Министр 2020 жылдан бастап АӘК-пен қамтамасыз етудің жаңа тәсілдері енгізілгенін, оның ашықтығын, әділдігін және еңбекке ынталандыруды көздейтінін еске салды.

“Көпбалалы отбасыларға табыстарына қарамастан, балалар санына қарай сараланған мөлшерде 42 500-ден (4 бала) 74 400 теңгеге дейін (7 және одан да көп бала) төленетін жәрдемақы енгізілді. Бұл жәрдемақы қазірдің өзінде шамамен 370 мың отбасына төленді. 2020 жылға осы мақсаттарға бюджетте 177,6 млрд. теңге қарастырылған. Қазіргі уақытта 8-ші және одан кейінгі балаға арналған жәрдемақыларды шамамен әр балаға 4 АЕК-тен саралау мәселесін қарастырудамыз. Мысалы, 8 балаға берілетін жәрдемақы мөлшері 85 мың, 10 балаға – 106 мың, 15 балаға – 159 мың теңгені құрайды”, – деді Біржан Нұрымбетов.

Сонымен қатар ол жаңа тәсілдерге сәйкес АӘК тоқсан сайын тағайындалатындығын атап өтті. Егер еңбекке қабілетті әлеуметтік көмек алушылар жұмысқа орналасуға жәрдемдесу шараларынан бас тартса, онда АӘК көрсету бүкіл отбасына тоқтатылатын болады.

“Ағымдағы жылдың 1 ақпанына көмек 37,4 мыңнан астам отбасына немесе 187,3 мыңнан астам адамға, оның ішінде 122,9 мың балаға тағайындалды. Сонымен қатар, табысы аз отбасылардың балалары үшін кепілдендірілген әлеуметтік топтама енгізілді және беріле бастады. Әкімнің әлеуметтік мәселелер жөніндегі орынбасарлары кепілдендірілген әлеуметтік топтамалардың уақтылы берілуін қамтамасыз етуі керек. Табысы аз отбасындағы әрбір балаға мемлекеттік көмек көрсетілуі керек”, – деді министр.

Біржан Нұрымбетов балалы отбасыларды қолдауға ерекше көңіл бөлінетінін атап өтті.

“Жыл сайын елімізде 400 мыңға жуық сәби дүниеге келеді. Ана мен баланы қолдау үшін бірқатар жәрдемақылар қарастырылған. Сонымен, бала туу және 1 жасқа дейінгі баланың күтімі үшін жұмыс істемейтін аналарға бюджеттен мемлекеттік жәрдемақы, ал жұмыс істейтін аналарға Мемлекеттік әлеуметтік сақтандыру қорынан әлеуметтік төлемдер қарастырылған. 2019 жылы бюджеттен 78 млрд. теңге, МӘСҚ-тен 167 млрд. теңге бөлінді. 2020 жылы бюджеттен 84 млрд. теңге және МӘСҚ-дан 187 млрд теңге бөлінеді”, – деп атап өтті Еңбекминінің басшысы.

Министр сондай-ақ бала күтімі бойынша демалыста жүрген әйелдердің зейнетақы жарналары субсидияланатынын атап өтті. 2019 жылы 5 млрд теңге бөлінгенін, 2020 жылға 6 млрд теңге қарастырылғанын айта кетті.

“Алтын алқа”, “Күміс алқа” алқаларымен марапатталған, “Батыр ана” атағын алған 235 мың көпбалалы аналарға арнайы жәрдемақы төленуде.

Мүмкіндіктері шектеулі балаға, бала кезінен бірінші топтағы кәмелетке толған мүгедекке күтім жасап отырған 99 мың адам ай сайын жәрдемақы алады.

“2019 жылы ана мен баланы қолдауға бюджеттен және МӘСҚ-дан 372,4 млрд теңге бөлінді. 2020 жылға осы мақсаттарға 558,5 миллиард теңге қарастырылған. Бүгін біз бала күтімі бойынша жәрдемақы мәселесін көтеріп жатырмыз. Біз оны төлеу мерзімін 1,5 немесе 3 жылға дейін ұлғайту нұсқаларын қарастырудамыз. Табысы аз отбасылардағы мектепке бармайтын мүгедек балаларға кепілдендірілген әлеуметтік топтаманы үйіне жеткізу мүмкіндігі қарастырылатын болады”, – деп түйіндеді Біржан Нұрымбетов.

Тағы оқыңыз:

Жер дауы. Әкімдер Тоқаевқа жалған ақпарат берген