Back

Мәдина Әбілқасымова: “9 айда 327 мың адам тұрақты жұмысқа тұрды”

Елімізде жыл басынан бергі 9 айдың ішінде 327 мың адам тұрақты жұмысқа орналасқан. Бұл туралы Үкімет отырысында ҚР Еңбек және халықты әлеуметтік қорғау министрі Мәдина Әбілқасымова мәлім етті.

Мәдина Әбілқасымова өз баяндамасында Еңбек және халықты әлеуметтік қорғау министрлігі «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасының жобасын әзірлегенін атап өтті.

««Еңбек» бағдарламасы мемлекеттік бағдарлама ретінде қайта бекітіледі. Бағдарламада оның қолданыстағы тетіктерінің тиімділігін арттыру және жаңа шаралармен толықтыру мақсатында кешенді өзгерістер көзделген. Мемлекеттік бағдарламаның негізгі мақсаты – еңбек ресурстарының білімін арттыру, жаппай кәсіпкерлікті дамыту және өзін-өзі жұмыспен қамтығандарды, жұмыссыздарды нәтижелі жұмысқа орналастыру болып табылады», – дейді ол.

Мәдина Әбілқасымованың айтуынша, аталмыш бағдарламаны іске асыру үшін 112,9 млрд теңге бөлінген. Жылдың соңына дейін осының аясында 571 мың азаматты жұмыспен қамту шараларына тарту көзделген.

«Осы жылдың 9 айының қорытындысы бойынша 82,5 млрд теңге (73 пайызы) игерілді. Қазандағы жағдай бойынша қолданыстағы бағдарламаны іске асырудың арқасында 563 мың адамды жұмыспен қамту шараларына тартуға жол ашылған. Нақтырақ айтқанда, 458 мың адам жұмысқа, оның ішінде 327 мың адам тұрақты жұмысқа орналастырылған»

– дейді Мәдина Әбілқасымова.

Министр атап өткендей, бағдарламаның бірінші бағыты еңбек нарығында сұранысқа ие мамандықтар мен дағдылар бойынша жаппай оқытуды көздейді.

Тегін техникалық және кәсіптік оқыту шеңберінде осы жылдың 1 қыркүйегінен бастап 20 мың адам оқуға кіріскен. Қазандағы жағдай бойынша 40 мыңға жуық бағдарламаға қатысушы қысқа мерзімді оқытуға жіберілген.

Дереккөз: Қазақпарат

Пікірлер

пікір