Back

Келес ауданында – рухани келісім күні аталып өтті

Келес ауданы әкімдігінің Ішкі саясат, мәдениет және тілдерді дамыту бөлімінің ұйымдастырумен 18 – қазан Рухани келісім күніне орай, Келес ауданының Абай ауылындағы №13 колледждің кіші футбол алаңында діни бірлестіктер арасында татулықты нығайту, салауатты өмір салтын насихаттау мақсатында «Рухани келісім – бейбітшілік кепілі» атты спорттың кіші футбол түрінен сайыс өтті.

Сайысқа аудандық «Ешан ата» мешіті ұжымы және жамағаты, сондай-ақ №13 колледж ұжымы және Келес аудандық жастар ресурсттық орталығы мамандары топ болып командаға бөлініп сайысқа түсті. Сайыстың ашылу рәсімінде сөз алған аудандық Ішкі саясат, мәдениет және тілдерді дамыту бөлімінің басшысы Д.Илесов:

– Сіздерді «Рухани келісім» күнімен шын жүректен құттықтаймын. Мемлекетіміздің басты стратегиялық бағыты – рухани келісім мен татулықты сақтау болып табылады. Бұл мереке ең алдымен ауданымызды ауызбіршілікке, татулыққа, ізгілікке бастайтын мереке. Еліміздің болашағы үшін сыйластықты сақтай отырып жұмыс жасау керек, – деді.

Сондай-ақ мерекелік іс-шарада ауданық «Ешан ата» мешітінің имамы А.Садиковте жарысқа қатысушыларға сәттілік тілеп, күнтізбемізге 18 қазанның Рухани келісім күні ретінде енуі – қазақ топырағына бейбітшілік орнатып, тұрақты қоғам құру идеясынан туған үлкен бастама екенін тілге тиеп өтті. Жалпы сайыс қорытындысы бойынша жеңімпаз командаға арнайы кубок табысталып, сайысқа қатысқан азаматтар алғыс хаттармен марапатталды.

 

Келес ауданы әкімінің баспасөз қызметі